Päivännouzu-Suomen yliopisto ezittäy Jovensuun da Kuopion linnoile kahten uvven professuuran finansiiruičendua. Sygyzyl 2023 yliopistos zavedih diplomuinženieroin opastus kolmes opastusprogrammas.
Yliopisto ezittäy Jovensuun linnale puutuotehtehniekan libo tuotandotehniekan alan professuuran da Kuopion linnale sulavutettuloin sistiemoin professuuran finansiiruičendua. Professuurat ollah viizivuodehizet. Kudaigi linnu finansiiruiččis professuurua viijen vuvven aigua 600 000 eurol.
Opastus- da kul’tuuruministerstvu andoi Päivännouzu-Suomen yliopistole tehnis-luonnontiijollizen alan opastusvastuolližuon paiči muudu sil ehtol, gu sendäh ministerstvale ei rodies ližäfinansiiruičendan tarvehtu.
Tehniekan alan specialistoi opastetah Jovensuus fotoniekan da kestäjien tehnolougieloin opastusprogrammois. Kuopios algavuu tehnillizen fiiziekan opastusprogrammu.
Vuotetah, gu Jovensuuh tulii professoru andas korgien tazon tiijollistu tutkimustu da opastustu enne kaikkie puun jalostandan tehnolougielois sego tevollizeh tuontandoh liittyjis tiemois.
Kuopios uvven professoran alannu on modernu sensorutehnolougii, tervehystehnolougizet innovaciet, tevolližustuotandon automatiziiruičendu da effektiivizembäkse luajindu sego sulavutettuloin sistiemoin elektrouniekku da ohjelmoičendu.
Lue myös:
Itä-Suomen yliopisto esittää Joensuulle ja Kuopiolle uusien professuurien rahoittamista