Dáidaga ovddidanguovddáš Taike lea juolludan (siirryt toiseen palveluun) 50 000 euro Mumenvággi-mánáidprográmma dubbemii golmma sámegillii. Ruhtadeami leat geahččalan oažžut čoahkkái jo jagi vai sáhttet dubbet ođđa buvttadanbaji Mumenvákkis.
Yle ruhtada oasi dubbemis ja dál loahpparuhtademiin viimmat besset fas bargui, illuda Mumenvákki kreatiiva hoavda Marika Makaroff Gutsy Animations -fitnodagas.
– Dál lea dárkkuhus dubbet 13 oasi, olles goalmmát buvttadanbaji sámegielaide. Dát ruhta lea hui dehálaš midjiide, almmá dan haga livčče váttis dahkat sámegielat dubbemiid. Sámegillii dubben lea divrras, golmmageardásaš eará vehádatgielaid ektui, muitala Makaroff.
Makaroff oaidná dehálaš bargun dubbet mánáidprográmmaid maid sámegillii, vaikko dat gáibidage stuorra ekonomalaš resurssaid. Dál vuostamužžan plánegohtet áigetávvala dubbemii.
– In máhte vel dadjat goas dubbemat leat gárvá, muhto geahččalit bargat nu jođánit go vejolaš, muhto nu ahte kvalitehta lea buorre.
“Dehálaš eandalii unnit sámegielaide”
Sámedikki gielladorvočálli Anne Kirste Aikio mielas iežasgielat mánáidprográmmat leat dehálaččat giellaealáskahttimis.
– In dieđe mo galggašin doarvái garrasit deattuhit, ahte man dehálaš lea buotlágan sámegielat fálaldagat, muhto eandalii tv-fálaldagat sámegillii.
Aikio mielas ii leat doarvái, ahte leat dušše guhkes filmmat sámegillii, muhto maiddái stuorát buvttadusat, mat bohtet juohke vahkus. Su mielas lea dál goit geavvan stuorrá ovdáneapmi ovddežii.
– Yle lea álgán joba Mumeniid dahkat iežas buvttadussan olggobealde Yle Sámi ruhtadeami, nu ahte dat lea jo stuorra lasáhus dan sámegielat mánáidprográmmaid buvttadeapmái. Muhto mii dárbbašivččiimet fásta ortnega, Sámediggihan lea ávžžuhan Yle jahkásaččat vuoruhit dubbet man nu prográmma sámegillii. Galggašii jámma buvttadit iige soaittáhagas.
Aikio oaidná, ahte sámegielat mánáidprográmmain lea stuorra mearkkašupmi eandalit unnit sámegielaide.
– Dain ii leat oba dat binnánašge mii mis lea davvisámegillii ja dat eai oaččo dan ávkki mii boahtá davvisámegielagiidda dan oasil, mii Norgga ja Ruoŧa bealde buvttaduvvo. Jurddaš makkár dakkár stuorra lasáhus dat lea daid fáládahkii.
Yle Ođđasiid Sámis ja Beaivvi ságaid sáhtát maid guldalit Yle Areenas.
