Yle Sääʹmm alttad 8.11. sääʹmǩiõllsaž oođâs- da ääiʹjpoddsaž teeʹmid ǩiõttʼtõõlli podcastt-prograamm Mâʹst jiõm mainsteʹče ääkkain. Võõrâs prograamm iʹlmstâʹvve juõʹǩǩ nuuʹbb mââibaarǥ da podcaast jeäʹmdââšš Yle Sääʹm tååimteei Janica Gauriloff.
– Muu miõlâst lij sami vääžnai, što sääʹmǩiõllsaž nuõrid puuʹtʼtet jiijjâz siiskõõzz sij jieʹnnǩiõʹlle. Õhttsallašvuõđ tarbb lij jõnn jie-ǥa mainstemsǩeâppren ääʹl suåv ouddmiârkkân jiijjâz puärraz leʹbe jeeʹres ruåđ, särnn Gauriloff.
Pueʹttmen lij õhttsallaš, vuârrvaaiktõõzzlaž da risttreeidaid tuõsttlõnji ǩiõttʼtõõlli sääʹmǩiõllsaž programm, koʹst mainstet õutstõʹsse priʹmeârlaž teeʹmin. Kuuitâǥ možât nåkam teeʹmin, koin ij mainsteʹče jiijjâs ääkkain leʹbe ääʹjjin.
Ođđ podcast jeäʹrben nuõrid da nuõrr vuõrâsoummuid, koid jie leäkku jiânnai siiskõõzz
Jååʹđteei Janica Gauriloff mâânn čõõđ õõutâst kuõʹssivuiʹm da õutstõõzzin teeʹmid, kook lie tobddâz sääʹmǩiõllsaž õutstõʹsse. Podcastt lij jurddum jeäʹrben sääʹm nuõrr vuõrâsoummuid, koin lij õʹhttekuullâm- da vuässadvuõđ tarbb di tarbb mainsted jiijjâz da õutstõssʼseez kuulli aaʹšši pirr.
Sääʹmǩiõll lij vaarvuâlaž ǩiõll. Jiijjâz ǩiõl mättʼtõõttmõš ǩeäss kuuitâǥ saaʹmi miõlid eeʹǩǩ eeʹjjest jäänab, leâša sääʹmǩiõllsaž siiskõõzz lie occanj.
– Mij tuõivvjen lij, što Mâʹst jiõm mainsteʹče ääkkain -podcastt ravvad sääʹmnuõri ǩiõlʼlaž identiteeʹtt da loŋŋat mainsted di mättjed jäänab. Ǩiõččâmvueʹjj lie čiõlggsânji nuõrr vuõrâsoummui da mainstemvueʹǩǩ lij persoonlaž di hääʹsǩõʹtti, leâša teeʹm säärnte puk õutstõõzz, kovvad Yle Sääʹm tååimtõsjååʹđteei Maiju Saijets.
Yle Sääʹm tååimtõs puuʹtat mieʹrrkõõski audio-, video- da teʹksttsiiskõõzz kooum Lääʹddjânnmest mainstum sääʹmǩiõʹlle di lääddas. Ođđ podcastt lââʹzzat minoriteʹttǩiõʹlle puuʹtʼtum siiskõsvaʹlljeemväär.
Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.