Siiddas ávvudit Eurohpá kommišuvnna kulturárbebálkkašumi, man sámemusea ja álbmotmusea ožžo sámegálvvuid máhcaheamis

Davvi-Sámi luondduguovddáš ja Sámemusea Siiddas Anáris ávvudit otne mánnodaga bálkkašumi, man Sámemusea Siida ja Suoma álbmotmusea leat ožžon sámedávviriid máhcaheamis dahje repatriašuvnnas. 

Bálkkašumi lea addán Eurohpá kommišuvdna ja kulturárbeorgnisašuvdna Europa Nostra. (siirryt toiseen palveluun)Sámemusea Siida ja Suoma álbmotmusea ožžo bálkkašumi luohkás Citizen Engagement & Awereness Rising, sámegillii álbmoga čatnaseapmi ja diđolašvuođa lokten.

Álbmotmusea máhcahii diibmá sámeservošii, Sámemusea Siidii, badjel 2 200 sámedávvira čoakkáldaga. Bálkkašanlávdegotti oainnu mielde sámečoakkáldaga máhcaheamis lea buhttemeahttun deaddu Eurohpá kulturárbbi dorvvasteapmin.

• Loga lasi: Dološ sámedávvirat leat joavdan ruoktot – Sámemusea Siiddas illudit: "Stuorra ja historjjálaš beaivi"

Bálkkašupmi lea geigejuvvon juo čakčamánus Prahas, Čeahkas, gos dan válddiiga vuostá Sámemusea siidda sadjásaš museahoavda Eija Ojanlatva ja Suoma álbmotmusea bajit hoavda Elina Anttila. 

Ávvuprográmmas guovddážis leat sámesearvvuš, repatriašuvdnaproseassa ja sámegálvvut

Siiddas ávvudoaluide leat bovden joavkkuid, geaidda fállet prográmma, mii lea temá mielde. Sámemusea Siidda álbmotdoaimmavástideaddji Pia Nikula muitala, ahte ávvuprográmmas leat guovddážis sámesearvvuš, repatriašuvdnaproseassa ja sámegálvvut.

– Miihan leat movtta ja hui ilolaččat. Midjiide stuorámus illu lea dat, ahte mii beassat bargat olbmuiguin, lohká Nikula. 

Siida lea rabas buohkaide bovdejuvvon gussiin fuolakeahttá, ja ávvubeaivvi gudnin fállet museabileahta oastán olbmuide nuvttá suomagielat ofelastima. 

Raba gova stuorábun

Europa Nostra lea organisašuvdna, mii lea vuođđuduvvon jagis 1963 ja lea jagi 2002 rájes juohkán Eurohpá kommišuvnna kulturárbebálkkašumiid mearkkašahtti fidnuide, álgagiidda ja olbmuide kulturárbesuorggis.

Suoma álbmotmusea bajit hoavda Elina Anttila muitalii geassemánus Yle Sápmái, ahte bálkkašumi oažžun lea hui mávssolaš guktuide museaide.

– Dát mearkkaša guktuide ohcciide dan, ahte min oktasaš prošeakta lea ožžon riikkaidgaskasaš fuomášumi. Dát lea mearkkašahtti eurohpalaš bálkkašupmi, son dajai.

Dán ášši gieđahallat maiddái mánnodaga Yle Sámi rádios ja TV-ođđasiin. Beaivvi ságaid ja Yle Ođđasiid Sámis sáhtát maid guldalit Yle Areenas.