Lujan tuulisviehkurin täh pyhänpiän rodih sähkökatkuo Pohjas-Karjalan eri čuril.
PKS Sähkönsiirron alovehel oli ilmai sähkyö nenga 2 200 talovuttu. Leviembät sähkökatkot oldih Lieksas da Juuvas.
Liberin suaristos iellehgi on läs 70 sähköttömiä talovuttu. Viga kohendetah ezmässargen.
Oudokummun Energien verkoalovehel oli nenga 600 aziekastu ilmai sähkyö. Carunan alovehel Jovensuun Karzikos oli läs puolen čuasun sähkökatkos.
Pellastuslaitoksel oli piäl 20 tuulisviehkurin täh roinnuttu ruaduo, ku yksittäzii puuloi kuadui dorogoile da trotuaroile.
Kondiilahtes Paiholantiele kuadunuoh puuh ehti ähkähtiäkseh yksi hengilömašin. Mašinan šouferi ei sattavunnuh, ga mašinah jäi ozattomuon jälgie.
Jovensuus da Nurmekses tuuli rebii taloloin levožestilöi.
Jovensuun toril tuuli kuadoi laukkuzualan srojindualovehen suojuaijat uuličale, kudamat pellastusruadajat kabrastettih bokkah. Tuulisbauhu jätti jälgie sežo tevolližusyrityksien pressuzualah.
Muakunnan kovembat tuulisviehkurit miärättih Liberis da Lieksas.
Ilmutiijon laitoksen dogadindoin mugah Liberin Tuiskavanluvvol tuulen vauhti pyhänpiän huondeksel nouzi piäl 23 metrih sekundas. Lieksan Lampelas tuulen vauhti oli läs 19 metrii sekundas.
Pahin tuulispyöröi bauhui Kuuzamos Rukatunturil, kus tuulen vauhti yldyi kai nenga 30 metrih sekundas.
Sunnuntainen myräkkä kaatoi puita ja repi kattopeltejä: Pohjois-Karjalassa oli enimmillään noin 3 000 sähkötöntä taloutta