Anárjávrri Siskelvuona rittu huksemiin lea šaddan digaštallan ja erenoamáš meannudanvuohki. Head Invest Oy fitnodat lea ođđasit ohcan Miesniemi (Almaanjargâ) guvlui gáddesajádatláva ráhkadeami.
– Fitnodaga plánain lea hukset alladását luopmoguovddáža lagamustá ásialaš jáválaš olbmuide, muitala Head Invest Oy -fitnodaga ovddasteaddji Jukka Puolakka.
Anár gieldda váldostivra gártá ođđasit mearridit das, ahte addojuvvogo lohpi cegget turistaguovddáža. Váldostivra hilggui mannan giđa gáddesajádatláva ohcamuša. Jienastanboađus lei 14 vuostá ja 13 bealis.
Anáris ordnejuvvui áššis álbmotdilálašvuohta 27.10.2022. Dan álgui arkiteakta Jarmo Lokio geavahii plánaid govvideamis namahusa ekoluksusturisma.
Almaanjargâ, Miesniemi turistaguovddáš livččii sullii logi kilomehtera Anár márkanis máttanuorttas. Dohko lea mohkkás sáttogeaidnu. Hotealla ja barttaid plánejeaddjit leat veháš vuolidan huksenviidodaga ja divvon plánaid bázahusfuolahusas.
Dan maŋŋá go váldostivra giđđat 2022 hilggui plána, de lea fitnodat dahkan dárkilut čilgehusa bázahusčáziid gieđahallamis.
– Dehálaš lea dál dat ahte bázahusat eai njammas eatnamii. Dan sadjái ráhkaduvvo duppalortnet, mas nu daddjon čáhppes duolvačázit mannet dáŋkkaide ja fas ránes duolvačáziide dahkko filterastinortnet, mii lea buorrin gávnnahuvvon, muitala Lokio arkiteaktadoaimmahagas.
Álbmotdilálašvuođas bukte ovdan fuola ráfi massimis, bázahusčáziin ja lávvameannudanvuogi dihte
Álbmotdilálašvuođas Anáris gullojedje ollu eahpádusat plána hárrái.
– Min bearaš lea ohcalan deikke luondduráfi dihte, lean behtton dáidda plánaide, dajai Rainer Mattsson, geas lea barta plánejuvvon turistaguovddáža bálddas.
Nu Mattsson go maiddái váldostivrra áirras Kari Tammela Anáris eahpideaba bázahusčáziid gieđahallama, váikkuhusa birrasii ja dan mo dat oba doaibmáge.
Ollugat leat imaštallan dan manin lávvaárvalus buktojuvvo ođđasit ovdan, vaikko gielddastivra lea easka hilgon dan.
– Váldostivrra mearrádus ii leat gudnejahttojuvvon, dadjá Mattsson.
– Lea gal erenomáš dilli, leago oba duohtage, ahte seamma lávvaárvalus buktojuvvo ođđasit, áidnalunddot dát lea, dadjá Tammela.
Beaivvi ságaid ja Yle Ođđasiid Sámis sáhtát maid guldalit Yle Areenas.