Vuohččulaš boazodoalli Jari Pulska lea ordnemin duljiid goikat erenomáš stellegiidda. Son lea stellen duolji fielluide gitta, dáinna vugiin son čáhkada dievva duljiid olgovuorkái goikat.
Dál bohccoduljiid jearahit nu olu, ahte illá gerget oba goikatge go ribadit daid jo, muitala Pulska.
– Olles áigge jearahallet, muhto iihan daid mearihemiid geargga spiilet. Safarifitnodagat ja bilkenolbmot jearahit eanaš.
Das ii leat go moadde jagi áigi go njuoska duljiid haddi gahčai sakka, ja boazodoallit gárte lánaid miel duššadit duljiid go daid ii oktage fuollan.
Loga lasi: Bohccoduollji ii jođe šat seamma bures go ovdal – "Gánniha fargga bidjat bázahusaide"
Álkes vuohki dinet lassi ruđa
Boazodoallit gártege smiehttagoahtit maid bargat duljiiguin, mat báhce njuovvamis. Dalle gávdne fas árbevirolaš vuogi goikadit duljiid. Dat lea álkes vuohki dinet lassi ruđa.
– Boazodoalli bastá goikadit duolji ruovttus ja vuovdit dan njuolgga iežas kundariidda. Buorre bealli lea maid, ahte hattiin bastá gilvalit, muitala Taljat rahaksi -fidnu prošeaktajođiheaddji Karoliina Majuri.
Fidnu álggahuvvui jagis 2021 Bálgosiid ovttastusa ja Lappi ámmátallaskuvlla ovttasbargun. Fidnu ulbmilin leamaš loktet bohccoduolji árvvu.
Majuri muitala, ahte davvin olbmot dovdet bures duolji buriid beliid. Son ávžžuhage boazodoalliid ieža vuovdalit duljiid olbmuide vai fidnejit dietnasa duljiin.
– Gánnehivčče fállat iešguđetlágan gávppiide duljiid vuovdimassii, ovdamearkan dakkár gávppiide, mat vuvdet skohter- dahje riidengálvvuid, rávvesta Majuri.
Boazodoalli mielas goikeduolji ii vuoitte mihkke
Boazodoalli Jari Pulska lea goikadan duljiid árbevirolaččat nu guhká go lea bargan bohccuiguin. Son ieš geavaha duolji áibbas árgabeaivválaš bargguin.
– Duolji alde lea buorre čippostallat go molsu rieggáid, ja rieggámuhtteratge bissot dan alde rájus. Dasto dat leat buorre misiid mearkumis ja jus reagasge čohkohallá.
Pulska mielas buoremus duollji lea goikeduollji ja dakkára máŋgasat háliditge alcceseaset.
– Sálteduolljihan njuoská dalán, goikaduvvon duollji gierdá guhkit ovdal go njuoská.
Beaivvi ságaid ja Yle Ođđasiid Sámis sáhtát maid guldalit Yle Areenas.