Njuike sisdoaluide

USA Suoma ambassadevra lea fuolas dálkkádatrievdama ekonomalaš váikkuhusain sámiide – "Eat sáhte dušše čohkkát ja vuordit"

USA Suoma ambassáda doarju máŋggaid sámiide dehálaš ja áigeguovdilis prošeavttaid ruđalaččat.

Douglas T. Hickey lea bargan USA Suoma ambassadevran mannan miessemánu rájes ja eamiálbmotáššit leat sutnje juoga veardde oahppásat. Govva: Maiju Saijets / Yle

USA Suoma ambassadevra Douglas T. Hickey oassálasttii mannan vahkus Levis _Aurora–_dáhpáhussii, mas ságastalle dálkkádatrievdama dagahan hástalusain. Ambassadevra lei mielde panelaságastallamis, mas suokkardalle riikkaid ovddasvástádusa dálkkatagažaldagain. Dáhpáhusas son beasai maid deaivvadit ja háleštit sámiiguin ja seammás gullat áigeguovdilis áššiin.

Hickey lea fuolas das , mo árktalaš guovllut liegganit ja makkár ekonomalaš váikkuhusat das leat sámiide. 

– Dat mii dáhpáhuvvá árktalaš guovlluin, dat dáhpáhuvvá olles máilmmis. Mii fertet bargat ovttas ja USA almmuhiige gieskat plána, mo dat háliida ovttasbargat eará árktalaš riikkaiguin. Eat sáhte dušše čohkkát ja vuordit, mii fertet doaibmat dálkkádaga bealis, dadjá Hickey.

USA ambassáda doarju sámedoaimmaid

USA Suoma ambassáda doarju máŋggaid sámiide dehálaš ja áigeguovdilis prošeavttaid. Gieskat sihke USA Suoma, Norgga ja Ruoŧa ambassádat juolludedje Sámiráđđái 1,5 miljovnna Norgga ruvnno sturrosaš veahkkeruđa Sami Made -dohkálašvuođamerkii, man ulbmilin lea suddjet sámi duoji ja sápmelaš buktagiid. Dasa lassin USA Suoma ambassáda ruhtada boahtte giđa sápmelaččaid spealuid ovddidanprošeavtta Ohcejogas.

USA Suoma ambassadevra Douglas T. Hickeymuitala sin leat hui rámiin, go besset doarjut Sami Made -fidnu. 

– Mii jáhkkit, ahte dat lea hui dehálaš sámeservodahkii. Olbmot galggaše gudnejahttit sámeservodaga ja dan gálvomearkkaid ja ulbmiliid. Dát fidnu veahkeha dan barggus, oaivvilda Hickey. 

"Alaska soabadanproseassa sáhttá ávkkástallat Suomas"

Hickey lea bargan Suoma ambassadevran mannan miessemánu rájes ja eamiálbmotáššit leat sutnje juoga veardde oahppásat. USA Suoma ambassáda juolludii gieskat ruđa maiddái dokumeantaprošektii, mii guoská duohtavuođa- ja soabadanbargui Suomas ja Alaskas. Hickey oaivvilda, ahte Suopma sáhttá oahppat Alaska duohtavuođa- ja soabadanproseassas. 

– Dat maid leat oahppan Alaskas, dan dieđu ja máhtu sáhttá ávkkástallat dál Suomas. Dat doaimmat mat eai doaibman Alaskas, daid seamma feaillaid ii dárbbaš geardduhit Suomas. Dát proseassa lea dehálaš sámeservodahkii, muhto sáhttá leat vel dehálut váldoservodaga ovddasdeaddjiide, vai sii áddejit mii dáhpáhuvvá ja manne ja addit dasa árvvu, dadjá Hickey. 

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat: paketissa on 10 artikkelia