Avveellâš Ulpu Mattus-Kumpunen ij pärnin pääihist sárnum ige kuullâm sämikielâ. Suu äijih kale sáárnui pyereest anarâškielâ, mut ij sunjin. Onnáá peeivi Mattus-Kumpunen kuittâg sárnu tavesämi- já anarâškielâ.
Suu kielâpálgást šadda dokumentfilmâ mon vuosâeehid lii máhđulávt jo taan ive Skammâkoveh-filmâfestivaalist. Fiilmâ ráhtá Säämi máttááttâskuávdáá medialinjá uáppee Jukka Vuorela-Morottaja.
Ulpu Mattus-Kumpunen kielâpäälgis lii lamaš mokkáá. Sun luuvâi tavesämikielâ škoovlâst Avelist. Rävisolmožin Tuurkust asâdijnis kuuloold päikkikiellân šoodâi tavesämikielâ, ko párnááh šoddii. Ko Mattus-Kumpunen perruinis varrij Anarân ive 2018, sun aalgij jiešráđálávt opâttâllâđ anarâškielâ já ive 2020 luvâškuođij anarâškielâ Säämi máttááttâskuávdáást. Tääl sist láá kulmâ päikkikielâ, suomâ-, tavesämi-, já anarâškielâ.
Ohtii Säämi máttááttâskuávdáá anarâškielâ tijmeest Mattus-Kumpunen muštâlij ubâ luokkan äijihis pääihist Movsháást. Mediasyergi uáppee Vuorela-Morottaja halijdij rähtiđ fiilmâ tien pääihist, mutâ taat lâi liijkás stuorrâ já muálkkáás fáddá vuosmuu dokumentin.
– Muái savâstâláim, ete mii ličij älkkeb fáddá. Jukka valjij muu ohtâvuođâ muu äijihân já anarâškielân. Maggaar lii muu kielâpäälgis, čielgee Mattus-Kumpunen.
Fiilmâst kulloo jienâ, mon Mattus-Kumpunen ij kuássin peessâm jieš kuullâđ
Filmâ ráhtoo suomâkielân, mutâ tast puáhtá kuullâđ mottoom verd meid anarâškielâ, Ulpu Mattus-Kumpusii äijih jienâ. Mattus-Kumpusii enni lâi vuorkkim äijih saavâid kasettin 1990-lovvoost. Iäskán tääl sun kaavnâi paadijd já kuulâi, mon pyereest äijih sáárnui anarâškielâ.
Nuorrân Mattus-Kumpunen teeivâi äijihijnis maŋgii, mut suái savâstâláin ain suomâkielân.
– Lam nuuvt luholâš, ko peesâm tääl kuullâđ suu sárnum, mut siämmást meid váhá suttâm sunjin. Sun sáárnui nuuvt pyereest kielâ, mut ij sárnum munjin, muurâš Mattus-Kumpunen.
Kuldâl lase Anarâš saavâid tääbbin.