Njuike sisdoaluide

Máŋga duhát kilo árbevirolaš herskot ja duodjeávdnasat bálkestuvvojit juohke dálvvi – njuovahagaid bázahusaide eai leat vurkkodansajit

Vaikko árbevirolaččat bohccos leat geavahan buot osiid, de dávjá njuovvanbázahusat ja dávttit bálkestuvvojit. Sámebálgosiid uhca njuovahagain eai leat vurkkodansajit bázahusaid várás. Veikko Feodoroff ballá bohccuin ávkkástallama árbedieđu jávkat.

Veikko Feodoroff katselee poronsisäelimiä Sevettijärven teurastamolla 18.11.2022.
Njuovahagaid bázahusat bálkestuvvojit go eai leat vurkkodansajit, vaikke Rihkku ja eará beatnágat gal mielas daiguin herskostalašedje. Govva ja video: Kirsti Länsman.
Mira Rauhala

– Boazu ii leat dušše dakkár, ahte dat addá bierggu ja ruđa, muhto das lea stuorát kultuvrralaš árvu, dadjá čeavetjávrelaš badjeolmmoš ja njuovvi Veikko Feodoroff.

Dattetge bohccuid njuovvanbázahusat šaddet dávjá ruskan, go sámebálgosiid uhca njuovahagain eai leat vurkkodansajit. Feodoroff lohká dan leat váivi go árbevirolaččat bohccos leat geavahan buot osiid.

– Gal buot osiiguin fertešii ávkkástallat, nu olu go vejolaš. Árbediehtuge jávká, go eai oainne das árvvu baicce mannet duššás, son lohká.

Feodoroff muitala, ahte moatteduhát bohccos šaddet guovtte guorbmebiilagontte dievva bázahusat nappo máŋga duhát kilo ovtta dálvvis. Árbevirolaš herskot ja duodjeávdnasat bálkestuvvojit. 

– Varrahan golgá gáivvui ja manná duššás. Mii eat leat vel ordnen rádjat daid ja vuoivvas manná maid duššás. Ja gaccat, juolggit ja guomočoavji mannet maid bázahusaide. Dat leat dat stuorámusat mat mannet duššás, Feodoroff čilge.

Feodoroff hálidivččii, ahte duojárat sáhtášedje atnit njuovvanbázahusaid ávkin. Son logahallá, ahte gápmasat, dávttit, gaccat ja čoarvvit leat buorit duodjeávdnasat. 

Njuovvanbázahusat heivejit beatnatborramužžan

Feodoroff oaivvilda, ahte njuovvanbázahusain sáhtášii buvttadit maid beatnatborramuša. Vaikko beatnagiid ja bussáid borramušat leat divron nu mo buot borramušgálvvut, de su mielas olbmot sáhtášedje eambboge čájehit beroštumi vai livččii beatnagiidda buhtes biebmu.

– Hui uhccán jearahallet bázahusaid, sáhttá maid nu ahte olbmot eai dieđe dan birra, son smiehtada.

Vai juolgelahkiid, oivviid ja iešguđetlágan dávttiid fidnešii ealliide borramušgálvun, de galggašii hukset stuorát sajiid njuovahahkii.

– Dat gáibida báikki gos daid seailluha, Feodoroff fuomášuhttá.

Maiddái Mátta-Suomas biebmoealliid gávpejas vuovddášii mielas eambo Suomas buvttaduvvon ealliid borramušbuktagiid dálá sávzza- ja heasttabierggus dahkkon borramušaid lassin. Dál gávppis leat dušše čoarvelahkit, ii olus eará.

– Aiddo dál mis ii leat olus mihkkige vuovdimassii. Bohcco čoarvvit ja norrasat leamaš, muhto eai geahppát dahjege siskilušat leamaš, muitala biebmoealliidgávppi Dogger gávpejas Tiina Rantanen.

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat: paketissa on 10 artikkelia