Njuike sisdoaluide

Sämitiggelaavâ vuástálisteijee mielâ muttui – laavâ kyeditteh tääl 80 prosenttid Sämitige jesânijn

Sämitige tievâsčuákkim tuhhiittij majebaargâ Suomâ haldâttâs iävtuttâs sämitiggelaavâst ovttáin nubástussáin. Ovdâlist iävtuttâs vuástálistám Anu Avaskari jienâstij iävtuttâs peeleest.

Anu Avaskari potrettikuvassa.
Anu Avaskari kyedittškuođij sämitiggelahâiävtuttâs.
Inger-Elle Suoninen,
Sáárá Seipiharju,
Suvi-Tuuli Fofonoff

Sämitige jeessân Anu Avaskari lii almolávt vuástálistám sämitiggelahâiävtuttâs. Olâttâs lâi-uv styeres, ko Avaskari majebaargâ Sämitige tievâsčuákkimist kyedittškuođij lahâiävtuttâs. 

Sämitige tievâsčuákkim tuhhiittij Suomâ haldâttâs iävtuttâs sämitiggelaahân ovttáin nubástussáin jienâiguin 15–3. Lahâiävtuttâs kyeditteh 80 prosenttid Sämitige tievâsčuákkim uásálisteijein. 

Iävtuttâs vuástálistii Inka Kangasniemi, Pigga KeskitaloKari Kyrö. Irja Seurujärvi-Kari jienâ lâi kuárus. 

Čuákkimist tuhhiittii Anu Avaskari iävtuttâs tast, ete puátteevuođâst sämikuávlu kieldâin ličij Sämitiggeest enâmustáá kyehti tiätumeresaje tááláá kuulmâ saajeest. Návt Sämitiggeest láá ucemustáá kyehti eidusâš já ohtâ värijeessân Iänuduvvâst, Ucjuuvâst já Anarist sehe Suáđikylást Laapi palgâs kuávlust. 

– Lahâiävtuttâssân poođij lasattâs. Tot lii lamaš munjin eromâš tehálâš äšši ain tääbbin Sämitiggeest, ete jis laahâ ovdán, te talle toho páácá taat cekki. Mun lam tuđâvâš, iätá Avaskari. 

Avaskari iävtuttâs mield loopâid Sämitige 13 jesânijn väljejeh jienâmere vuáđuld. Iähtun lii kuittâg tot, ete ucemustáá vittâ jeessân kalgeh leđe sämmilij päikkikuávlust. 

– Muu mielâst tot, ete ubâ algâaalmug ovdâstuvvoo, lii pyerebeht täsitiädust tain vuovvijn.

Kari Kyrö kuulâi Avaskari miärádâsâst eskân Sämitige tievâsčuákkimist

Anu Avaskari já sämitiggelahâiävtuttâs vuástálistám Kari Kyrö lává táválávt lamaš Sämitiggeest aašijn oovtâuáivilist. Kyrö kuulâi Avaskari miärádâsâst eskân jiävttáá tievâsčuákkimist.

– Tiäđust-uv tot lâi mottoomlágán olâttâs, mutâ ij vaarâ kuittâg nuuvt hirmâd styeres. Mun lam suu lihâstâsâid hárjánâm uáiniđ jo ovdâlist, Kyrö iätá. 

Sämitige saavâjođetteijee Tuomas Aslak Juuso lii tuđâvâš tievâsčuákkim miärádâsân. 

– Hirmâd puorijn mieláin tiäđust-uv, ete náávt stuorrâ eenâbloho lii iävtuttâs tyehin. Tot lii uáli pyeri vuolgâsaje vyelgiđ ovdâskulij aššijn já tuáivui mield ovdâskodde pasta tääl kunnijâttiđ sämmilij jiešmeridemorgaan tuoivuu. 

Sämitige tievâsčuákkim miärádâs sämitiggelahâiävtuttâsâst šoodâi ráđádâllâm puáđusin, mon Avaskari lâi ornim. Ráđádâllâm tollui peeivi ovdil tievâsčuákkim. 

Avaskari muštâl, ete tuárju uđđâ sämitiggelahâiävtuttâs.

– Laahâ lii jo lamaš vuolgâttâssavâstâlmist ovdâskoddeest, ete maht áášán, mii lii jo joođoost, puáhtá val vaiguttiđ. Tot lii tast tääl tergâdumos.

Kuldâl lase anarâš saavâid tääbbin.

Ođđasamosat: paketissa on 10 artikkelia