Gaskavahku almmustuvai nuorra suopmelaš doaimmaheddjiid vuosttas pop-up báikkálašáviisa, Uusi Inari. Vástideaddji doaimmaheaddji Mari Uusivirta muitala, ahte Anára lei álki válljet dainna go dat lea báikkálaš journalismma dáfus hirbmat miellagiddevaš. Gieldan dat lea oalle riikkaidgaskasaš ja eandalii njealje giela ja kultuvrra gieldan dát lei sidjiide beroštahtti.
– Dalán go jurdda dás bohciidii de jođánit buoremus molssaeaktun gávnnaheimmet Anára. Go dahká báikkálaš journalismma de Anár lea erenoamáš guovlu máŋgga sivas. Gieldda sturrodat, sajádat, sápmelaččat, njealjegielatvuohta, riikkaidgaskasašvuohta. Mii dahkkit leat beroštuvvan davviguovllus, čilge manin sii háliidedje boahtit Anárii.
– Pop-up báikkálaš aviissain heive bures buktit ovdan sierra guovlluid erenoamášvuođaid ovdan. Eai gallis oba várra jurddašge, ahte Anárii lea Helssegis seamma guhkes mátkki go Kiovai Ukrainas, ákkastallá doaimmaheaddji Mari Uusivirta.
Aviisaalmmuheami oktavuođas dajaldat pop-up mearkkaša juoidá mii lea vuorddekeahtes ja gaskaboddosaš. Vástideaddji doaimmaheaddji Mari Uusivirta muitala, ahte sis lea oaivil almmuhit giđđadálvve fas fierbmeaviissa jus joavkoruhtadeapmi lihkostuvvá.
Mihttomearrin sis lea, ahte ruhta čoggo unnimustá dan mađi ahte gokčá goluid. Uusivirta dáhkida ahte oaivil ii leat riggut dáinna aviisaalmmuhanvugiin.