Njuike sisdoaluide

Beowulf doaimmajođiheaddji jáhkká ruvkkedoaimma álgit Gállokis

Áramustá guovvamánus lea vuordimis ahte Ruoŧa ráđđehus mearrida, oažžugo eaŋgaslaš Beowulf doaibmalobi ruovdemálbmaruvkii Gállokii Johkamohki oarjjabeallai. Fitnodaga doaimmajođiheaddji jáhkká ahte ráđđehus addá lobi ruvkedoaimma álggaheapmái.

Kurt Budge, Beowulf ságajođiheaddji. Govva: Per Vallgårda / Sveriges Radio
Ailu Valle

Áramustá guovvamánus lea vuordimis ahte Ruoŧa ráđđehus mearrida, oažžugo eaŋgaslaš Beowulf doaibmalobi ruovdemálbmaruvkii Gállokii Johkamohki oarjjabeallai. Fitnodaga doaimmajođiheaddji jáhkká, ahte ráđđehus addá lobi ruvkedoaimma álggaheapmái,P4 Norrbotten (siirryt toiseen palveluun)muitala.

Čielggadit iešguđet fievrredanvugiid

Beowulf doaimmajođiheaddji Kurt Budge jáhkká, ahte ruvkedoaibma lea jođus njealje-viđa jagi geahčen ja ahte jus nu šaddá, ulbmilin lea čielggadit iešguđet molssaeavttuid das, mo málmma lea vejolaš fievrredit.

– Mii čielggadit fievrredeami bealis guorbmebiillaid, ruovdegeainnu, butkkiid ja fievrredanlávžžiid, ja viggat gávdnat vuogi, mas leat unnánamos birasváikkuhusat, lohká Budge.

Deaivvada eará oassebeliid muhto ii sápmelaččaid

Budge lea galledeamen dán vahkus Norrbottenis ja deaivá Johkamohki gieldda ovddasteaddjiid ja ruvkedárkkisteaddji Åsa Perssona. Giige ii goittotge leat deaivamin ovttage ovddasteaddji sámečearuin, mat leat vuostálastán ruvkke ceggema.

– Boazodoallit leat dál justa badjedilis ja gitta boazobargguin, de čoahkkima lei váttis ordnet. Ulbmil lea deaivvadit singuin maŋŋelis, lohpida Budge.

Viggamuš buoridit Beowulf beaggima

Budge lea addán báikkálaš mediaide valjis jearahallamiid ja sus leage dárbu buktit ovdan čielga sealgga, ahte dáláš Beowulf lea eará fitnodat go ovdal ja das lea oalát ođđa jođiheaddjit.

Geassit 2013 Beowulf oaččui duođai garra kritihka doaimmaidis beales miellačájáhusaid oktavuođas.

Beowulf daláš ságajođiheaddji Clive Sinclair Poulton vástidii gažaldahkii báikkálaš olbmuid birra dalle dušše "mat báikkálaš olbmot".

– Mun in leat dat olmmoš, gii nie dajai, Budge lohká.

Budge mielde fitnodagas lea oalát earálágan doaladupmi báikkálaš intreassaid ektui go ovdal.

– Mii hálidit leat mielde servodaga ovdánumis ja ráhkadit vásttolaš dialoga buot oassebeliiguin, Budge dadjá.

Jáhkká ruvkefidnu álgit

Budge mielde fitnodagas ii leat váttisvuohta gávdnat investerejeaddjiid Gállokii, vaikko máŋgasat vurdet Ruoŧa ráđđehusa mearrádusa ruvkedoaibmalobiid ektui ovdalgo bidjet dasa lasi ruđa.

Beowulf doaimmajođiheaddji jáhkká, ahte ráđđehus miehtá ruvkefidnui.

– Mu mielas mis lea sivva jáhkkit, ahte mii leat vuđolaččat dokumenteren dán leat vejolaš, ja maŋimuš jahkebeali áigge leanaráđđehus ja ruvkedárkkistanvirgedoaimmahat Bergsstaten lea dadjan juo ruvkedoaibmalohpái. Nu mun jáhkán dáinna geainnuin mii ovdánit, lohká Budge.

Ođđasamosat: paketissa on 10 artikkelia