Kielâ puáhtá pyereest oppâđ meid njaavijd pivdemáin, tom laa huámmášâm Säämi máttááttâskuávdáá anarâškielâ ja -kulttuur lohheeh.
Sist láá kulmâ kuálástemkuursâ luuhâmpuudâ ääigi já ohtâ tain lii njähipivdokurssâ. Ulmen lii oppâđ anarâškielâ luándulii pirrâsist.
Eine Kangas lii ohtâ uáppee, kii lii puáttám pivdeđ njaavijd kielâoppâm tiet. Sunjin kurssâ lii lamaš ávhálâš.
– No, kalehan mun lâm oppâm uđđâ saanijd váhá já tiäđust-uv ko mii sárnup ubâ ääigi anarâškielâ ko mii porgâp tääbbin, Eine Kangas moijáá.
Uáppih siämmást anarâš ellimvyevi
Uáppeeh láá moovtâ ko sii uážžuh porgâđ, ige taarbâš tuše čokkáđ luokkâst, návt uđđâ säänih-uv tarvâneh pyerebeht uáiván. Kielâ lasseen uáppeeh uáppih tain vuovvijn meid anarâš ellimvyevi.
Säämi máttááttâškuávdáá anarâškielâ lehtor Anna Morottaja uáivild, ete kielâmiäštáreh ruokâsmiteh uáppeid sárnuđ kielâ.
– Naa, ete tobbeen piäsá sárnuđ, et tobbeen lii miäštár, liävus talle kuálástemiäštär teikkâ kielâmiäštár, mut ete lii kiinii kii sárnu luándulávt tobbeen.
"Stuorrâ hersku"
Njäävih tarvânii vuogân já pivdem já čollim maŋa tain kalga tiäđust-uv vuoššâđ njähimääli. Tot lii Eine Kangas mielân.
– Hersku, tot lii aaibâs stuorrâ hersku, Kangas iätá.
Njäävi näähki puáhtá kevttiđ tuoijuumân. Ubâ kyeli kiävttoo tárkká.
_Keejâ ääšist lase onne Yle Ođđasat -vuolgâttâsâst Yle tv1:st tijme 15.15! _