Yle Uudizet karjalakse voibi kuulta joga piätteniččiä Ylen päivännouzusuomelazes muakunduradivos. Enzimäzen kerran karjalankielizet uudizet kuuluttih Pohjas-Karjalan Radivos 27.2.2015.
Puolen vuvven peräs karjalankielizien uudizien kuuluvusaloveh suureni, da nygöi niidy kuultah sežo Pohjas-Savos da Suvi-Savos. Uudizih näh on tulluh äijy pozitiivistu työndyö.
– Äijät radivokuundelijat ollah saneltu, gu hos iče hyö ei paista karjalakse, ga opitah kuunnella tunnistettavii sanoi da sen kauti ellendiä kogo virkehii, sanou Yle Päivännouzu-Suomen piälikkö Johanna Raatikainen.
Yksi karjalankielizii uudizii rakkahal kuundelii on oudokumbulaine Marjatta Ruotsalainen. Hänelleh karjalan kieli on armas da tuttu jo lapsuos, sendäh gu hänen tuatto pagizi karjalakse. 70 vuottu täytettyy Marjatta Ruotsalainen vaihtoi oman virrallizen muamankielen suomen karjalah. Häi ei opastu kieldy opastundukniigoin avul, ga pagizou sidä muga, kui hänen tuatto pagizi da muut karjalankielizet paistah.
Ruotsalainen sanou, gu hänelleh roih hyvä mieles ainos, konzu häi kuulou karjalankielisty paginua. Karjalankielizii radivouudizii häi kuundelou hyväl mielel.
– Hyvälhäi se tuntoo, ko kuuloo omal muamonkielel uutisii, kiittäy Ruotsalainen.
Radivouudizet omas puoles pietäh kieldy elävänny
Lähetyksis kuultavat uudizet ollah Ylen uudizii, kuduat on kiändänyh karjalakse Päivännouzu-Suomen yliopiston tutkii Natalia Giloeva. Häi sežo iče lugou uudizii Ylen Jovensuun toimitukses käyttäjen omua karjalankielisty nimie Hiloin Natoi.
– Olen kiändänyh äijän eriluadustu tekstua, ga uudizien kiändämine oli minulleni uuzi dielo. Enimite uudizis on tulluh pozitiivistu työndyö, kuvailou Giloeva.
Joga päiviä karjalan kieldy pagizou Suomes läs 5 000. Suomes karjalan kielel on vähembistökielen status. Johanna Raatikainen Ylelpäi pidäy palveluu tärgienny.
– Se on meijän taba andua tugie kielen säilyttämizele da kehittämizele, sendäh gu uudiskieli on hyviä nygyaigastu yleiskieldy. Jogahizele kielele on tärgei, gu sidä käytettäs da se uvvistus aijan mugah, tovendau Raatikainen.
Yle Uudizet karjalakse -lähetykset piätteniččöin Yle Jovensuun, Yle Kuopion da Yle Mikkelin tuajuol 13.45 aigah da uvvessah 17.45 aigah. Karjalankielizii uudizii voibi lugie da kuunnella sežo Ylen internet-saital.