Päivännouzu-Suomen yliopisto on suannuh lahjoituksennu ainavoluaduzen karjalan kielen tutkimusainehiston. Kodimualazien kielien keskus on lahjoitannuh kogonazen karjalan murdehien sana-arhiivan Jovensuun kampuksele. Sih sana-arhiivah kuuluu läs 550 000 arhiivulippuu, kuduat on kerätty enimite 1800-luvun lopus da 1900-luvun allus.
Ainehisto on olluh pohjannu vuvvennu 2005 valmistunnuole Karjalan kielen sanakirjale. Kogonaine sanakniigu löydyy sežo sähközenny internetas.
Karjalan kielen da kul’tuuran professoru Vesa Koivisto sanou, gu pagin on kaikkii suurembas karjalankielizes materjualas.
– Tämän suuruttu ainehistuo ei ole enämbiä nikus, sanou Koivisto.
Lahjoitukseh kuuluu sežo enne julguamattomua suomelazien karjalantutkijoin tutkimusmatkois suaduu ainehistuo.
Täs ainehistos löydyy ezimerkikse akademiekku Pertti Virtarannan (1918–1997) materjualua. Häi tutki da pani tallele karjalan kieldy piäl 50 vuvven aijan.
Päivännouzu-Suomen yliopisto rubieu käyttämäh suaduu ainehistuo karjalan kielen da kul’tuuran tutkimukses da opastukses. Karjalan kieldy da kul’tuurua opastetah yliopistos vuvves 2009 algajen.
Tutkimusmaterjualoin luovutus on vuitti karjalan kielen tutkimuksen keskittämisty Päivännouzu-Suomen yliopiston Jovensuun kampuksele.
Karjalan kieli on Suomes kodiperäine kieli. Karjalakse paistih aijemba enimite Raja-Karjalas Luadogan pohjazil alovehil. Enne tostu muailman voinua Suomes oli 30 000–40 000 karjalan kielen pagizijua.
Nygöi karjalan kielen maltajua on Suomes vai setämä tuhat.
Luve sežo
Ainutlaatuinen karjalan kielen tutkimusaineisto Itä-Suomen yliopistolle