Nurmes rubieu tavoittelemah miljonan jeuron palkinduo karjalastu kul’tuurua korostajen.
Nurmes ottau ozua Suomen iččenäžyön pruazniekkurahaston Sitran Ratkaisu 100 -kilbah käyttäjen idejua Karjala on voimuvara. Sen piäkohtat ollah karjalazen kul’tuuran kunnivoiččemine, puurakendamizen kannattamine da ruattavuon ližiämine.
Karjalažus hyvin nägyy da eläy pohjaskarjalazes läs 8 000 eläjän Nurmekses. Linnas ezimerkikse sijaiččou Bomban taloi da karjalaine kylä, kuduat ozutetah rajakarjalastu kul’tuurua.
Karjalaine kul’tuuru yhtistäy meijän muan Ven’anke. Ezimerkikse tulien kezän Nurmekses pietäh Karjalaine pajopruazniekku (Karjalaiset laulujuhlat), kuduadu järjestetäh joga vuottu vuorokkai Ven’al da Suomes.
Piäkohtih kuulutah sežo karjalan kielen säilyttämine, karjalazet kauppumiesmaltot da puuarhitektruuru. Hyvä ezimerki perindöllizes srojimizes on nygöine Puu-Nurmes.
Linnanjohtai Asko Saatsi sanou, gu idejua maksau ozuttua rohkieh da ebäilemättäh.
– Nygöi kieli da kul’tuuru ollah endisty tärgiembät. Jeuroupas tämä nägyy ezimerkikse Ispuanies.
Iččenäzele Suomele roih tulien vuon 100 vuottu, da Sitra tahtos löydiä moizen yhteskunnallizen idejan, kuduas vois luadie merkittävy kanzalline tulien aijan projektu.
Ratkaisu 100 -kisa on avvoi kaikile suomelazile. Ehoitukset pidäy jättiä Sitrale 14. sulakuudu 2016 sah. Kilvan tulokset tiijustetah vuvven 2017 lopus.
Luve sežo