Riikkabeivviid birasváljagotti ságadoalli, ruonálihtu riikkabeaiáirras Satu Hassi oaivvilda, ahte davimus Sámi vuvddiid galggašii suodjalit buorebut.
Hassi galledii Anáris mannan vahkus ja oahpásnuvai ovdamearkka dihtii Muttošjavrri bálgosa guohtuneatnamiidda.
Riikkabeivviid birasváljagotti ságadoalli Satu Hassi lea hirpmástuvvan davimus Sámi vuovdečuohppamiin. Daid galggašii ráddjet.
– Sáhtášii ságastallat dan birra, ahte galggašiigo evttohit muhtun ráddjehusaid, ahte livččii muhtunlágan suodji beazi davimus rájis, gos eai čuohpašii, ahte go dat goittotge šaddá nu njozet doppe, Hassi dadjá.
"Olbmot máddin eai ádde"
Ovdamearkka dihtii Anárjávrri birrasis boarráseamos muorat leat juoba 800 jahkásaččat. Dábálaš gaskaahki jorrá 300-400 jagis, nu ahte muorat leat geargan oaidnit máŋggalagan áiggiid.
Leat gierdán garra biekkaid, muhto sáhttá leat, ahte ovtta áššis dat eai beasttašuva, vuovdečuohppamis.
Satu Hassi mielas máttaolbmot eai ádde, makkár muorat davimus Suomas šaddet.
"Sámi muorain ii gánnet ráhkadit báhpára"
Riikkabeaiáirras Satu Hassi mielas son vel juogaláhkai áddešii vuovdečuohppamiid, juos muorat geavahuvvošedje buoret atnui, go dušše báhpára ráhkadeapmái.
Sámi beahccemuorra lea dovddus das, ahte dat lea vuos issoras garas, muhto dan lassin das lea maid čappa ivdni ja dat ii leat nu hearki muorradávddaide.
– Dan vel sáhtášii monu áddet, jos muoraid geavahivčče dasto vaikke lássegárpmaid ráhkadeapmái, mas dan mávssolaš garra muora iešvuođaiguin sáhtášii ávkkástallat. Dallehan das oaččošii olu buoret hatti ja gánske dan sáhtášii čuohppat nu, ahte ii vahágahte meahci nu olu, Satu Hassi lohká.
