Vuovde-, guolásteaddji- ja duottarsámit -searvi (VGDS) doalai jahkečoahkkima helloduorastaga Savukoskis.
Doaibmabadjái 2016–2018 searvvi ságadoallin válljejuvvui Ari Laakso Eanodagas.
Laakso doaibmá dieđádoaimmaheaddjin Lappi universitehtas.
Badjel 50 olbmo jahkečoahkkimis
Várreságadoallin joatká Tuomas Keskitalo Eanodagas. Eará áitosaš stivralahttut leat Olavi Aikkila Guossamis, Jukka Kaaretkoski Soađegilis, Leena Pyhäjärvi Soađegilis ja Eila Ylilokka Savukoskis.
Várrelahttun stivrii válljejuvvojedje Johanna Laurila Sallas, Reijo Kyrö Gihttelis, Harri Siitonen Gihttelis ja Mika Flöjt Guossamis.
– Jahkečoahkkin lágiduvvui Meahciráđđehusa oahpistanguovddáža auditoriijas, gosa báikki ala ledje boahtán olu guldaleaddjit ja searvvi lahttut, badjel 50 olbmo, muitala Ari Laakso.
Dearvvahusat riikkabeaiáirasiin
Jahkečoahkkima oktavuođas lágidedje dieđálaš seminára, mas logaldalle searvvi ovddeš ságadoalli, dutkidoavttir Erika Sarivaara ja dutki Juha Joona.
– Lassin vásáhussáhkavuoru buvttii ovdan Eila Ylilokka. Báikki alde lei maid riikkabeaiáirras Eeva-Maria Maijala (guovd), guhte buvttii dearvvahusa riikkabeivviin jahkečoahkkimii. Riikkabeaiáirras Mikko Kärnä (guovd) ii beassán boahtit báikki ala, muhto sáddii jahkečoahkkimii čálálaš dearvvahusa, Laakso muitala.
