Anára arkeologalaš roggamiin olu gávdnosat
Anáris leat dál jođus arkeologalaš roggamat, main leat gávdnon juo olu diŋggat. Gažaldagas leat nuppi máilmmisoađi áigásaš duiskalaš soahtebuohcceviesu bázáhusaid roggamat.
Yle Uutiset Lappi 5.8.2016 (03:04-)•
Anára gili lahkosis leat dán vahkus álgán roggat nuppi máilmmisoađi áigásaš duiskkalaš soahtebuohcceviesu bázáhusaid.
Maiddái dábálaš álbmot leat beasset duorasdaga fitnat oahpásmuvvamin rogganbargguide.
– Rogganbargut leat vuolgán bures johtui ja olbmot leamaš movtta vaikko dán vahkus leage arván, dadjá Helssega universitehta dutki Oula Seitsonen.
Roggandutkama ordnejit Helsset ja Oulu universitehtaid Lappi sevdnjes kulturábi -prošeakta ja Sámemusea Siida.
Helssega Universitehta dutki ja arkeologa Oula Seitsonen muitala, ahte gávdnosat leat eanet go sii vurde.
– Roggamiin lea gávdnon juobe olu eanet maid mii vurddiimet. Mii diđiimet, ahte olu diŋggat leat, muhto dat leat olu eanet go bajil orui. Jáhkkimis dás lea leamašan dakkár rádju, mii lea buollan. Dan dihte dás leat nu olu diŋggat go dál lea. Spánja dievva porsliidna ja iešguđetlágan unna buohcceviessodoibmii gullevaš gávdnosat. Cirgehagat, termomehtera bihtát, dálkkasburkke bihtát ja lohkit ja dien diekkárat, muitala Seitsonen.
Roggamat bistet dán vahku.