Sámemusihka skuvlejupmi ja Sibelius-Akademiija leat plánen álgit ođđa ovttasbarggu boahtte lohkanbájis. Ovttasbargguin háliidit lahkonit musihkkaoahpahusa nu, ahte kultuvrralaš sierraláganvuođat leat vejolašvuođat oahppat eaige eastagat maid studeanttat ja oahpaheaddjit fertet rasttildit. Dáid guokte lágádusa ovttasbargu lea ArtsEqual-dutkanprošeavtta (www.artsequal.fi) boađus, mii dutká mo dáidda sáhttá deaivat 2020-logu sosiálalaš hástalusaiguin.
Ovttasbargu ArtsEqual dutkiin
Sámemusihka skuvlejumi vuođđudeaddjit Anna Näkkäläjärvi-Länsman ja Annukka Hirvasvuopio-Laiti leaba ovttasbargan ArtsEqual dutkiin Alexis Kallioin juovlamánu 2015 rájes. Kallio dutká makkár hástalusat sámi artisttain ja studeanttain leat, go geahččalit beassát mielde Suoma dáidaga vuođđooahpahussii. Kallio dutkamuš maiddái geahččala gávdnat ođđa, eambbo demokráhtalaš lahkonanguovlluid dáidaga oahpahussii ja oahppamii.
Dat dárkkuha ahte dan sajis ahte ohcat Suoma dáidaga vuođđooahpahusa systemas saji sámi dáidagii, geahččalit hutkat ođđalágan čovdosiid ja ovttasbargovugiid dáidaga oahpahussii, nugo plánejuvvon ovttasbargu Sámemusihka skuvlejumi ja Sibelius-Akatemiija gaskkas lea.
Besset juohkit sierralágan perspektiivvaid
Lágádusaid ovttasbarggus studeanttat ja oahpaheaddjit besset juohkit sierralágan perspektiivvaid ja čehppodagaid. Anna Näkkäläjärvi-Länsman sávvá ahte goabbáge skuvlla studeanttat oččot ođđalágan ipmárdusa dás, maid dárkkuha leat artista dahje dáidaga oahpaheaddji máilmmis, mii oaidná sierraláganvuohta fápmun iige hástalussan.
Sámemusihka skuvlejumi lea Sámi oahpahusguovddáža prošeakta man ruhtada ELY-guovddáš ovttas Ohcejoga, Anára ja Eanodaga gielddaiguin.