Sámemusihka skuvlejupmi ja Sibelius-Akademiija leat plánen ovttasbarggu boahtte lohkanbájis. Skuvlejumi nubbi oahpaheaddji Anna Näkkäläjärvi-Länsman muitala, ahte su mielas galggašii geahččat viidásabbot máilbmái, ja ohcat doppe bargovugiid ja čehppodaga.
– Mun lean dál álgán plánet oahpahusa boahtte lohkanbádjái ja mus leamašan dakkár višuvdna, ahte mii eat sáhte báhcit deike Ohcejohkii smiehttat, ahte makkár dat musihkka lea ja maid das galggašii oahpahit. Muhto baicce geahččat viidásabbot dohko máilbmái ja ohcat doppe dakkár elemeanttaid ja bargovugiid ja čehppodaga, man mii sáhttit oahppat ja váldit deike. Ja mun jáhkán das dasto lea ávki maiddái sámemusihkas, mii dieđusge lea min oahpahusa vuođđu.
Dábálaš oahpahus ja gáiddusoahpahus
Näkkäläjärvi-Länsman muitala, ahte ovttasbargu ollašuhttojuvvo earet eará gáiddusoahpahussan ja bargobájiiguin.
– Mis leat sihke gáiddusoahpahusa bokte dát ovttasbargu ja dasto maiddái dakkár aivve dábálaš oahpahus luohkkálanjas. Mii oažžut Sibelius-Akademiijas logaldallamiid, mat heivejit min oahppaplánii, ovdamearkka dihte máilmmi musihkas. Ja dat bohtet doppe global music -linnjás, Sibelius-Akademiijas.
– Ja dasto mii leat plánen giđđii dakkár bargobájiid lonohallama, ahte global music -studeanttat dollet midjiide bargobájiid sin surggiin, ja de mii doallat min ohppiiguin fas sámemusihkas sidjiide bargobájiid, muitala Näkkäläjärvi-Länsman.
"Hui buorre oktavuohta"
Anna Näkkäläjärvi-Länsman jáhkká, ahte ovttasbargu lihkostuvvá bures. Son lea jo deaivan Sibelius-Akademiija oahpaheddjiid.
– Mun deiven Helssegis daid oahpaheddjiid, ja dat gal leat hui innovatiivvalaččat ja duođain háliidit veahkehit min, go mii leat easka ásaheamen dán skuvlla deike Ohcejohkii. Orui, ahte mis lei hui buorre oktavuohta jo dalle álggus ja sihkkarit maiddái min studeanttaiguin dasto boahttevuođas.
Näkkäläjärvi-Länsman jáhkká, ahte sii sáhttet oahppat earet eará musihkkakultuvrraid laktimis ođđa elemeanttaide.
– Mun jáhkán, ahte doppe lea dakkár vehá earálágán čehppodat, mas mii sáhttit oahppat, ovdamearkka dihte juste vaikko dakkár bargobájiid oahpaheamis ja de dakkár eará musihkkakultuvrraid laktimis ođđa elemeanttaide, ahte dat musihkkakultuvrrat bohtet deike Sápmái ja mii laktit dasa dan sámemusihka dalle.
– Sis lea várra dakkár vehá earálágán geahččanguovlu fas musihkkii min ektui. Lea hui suohtas álgit de oahppat das, ahte mii das de šaddá, go mii jurddašit nu eará láhkai sihkkarit.
"Buot buoremus skuvla musihkas"
Anna Näkkäläjärvi-Länsman lea iešge studeren Sibelius-Akademiijas.
– Munhan studerejin doppe klassihkalaš musihka bealde. Dieđusge mun vázzen dalle maiddái álbmotmusihka kurssaid, ahte in bisson ollásit dušše klassihkalaš musihka bealde.
Näkkäläjärvi-Länsman jáhkká, ahte su iežas oahput Sibelius-Akademiijas leat váikkuhan dasa, ahte son hálidii ovttasbarggu juste Sibelius-Akademiijain.
– Sihkkarit dat lea váikkuhan dan láhkai, ahte mun dovddan dan dálu ja dovddan, mat buot linnját doppe leat ja makkár bohtosiid dat buktá dan servodahkii. Dat lea várra buot stuorámus ja buot buoremus skuvla musihkas Suomas, ahte dieđusge mun de dohko vulgen ohcat ovttasbargoguoimmi, go dakkára háliidin dasa mielde.
Anna Näkkäläjärvi-Länsman lea odne 17.8. Yle Sámi Geasseradio-sáddagis muitaleamen sámemusihka skuvlejumi ja Sibelius-Akademiija ovttasbarggu birra.