Kummua sanot, ga se on tottu. Vuvvennu 2001 oman toimindan loppenuon Ultra Bra -bändin ozanottajat vakustettih vuvves toizeh, gu joukkovehes ei pie vuottua järillehtuluo, hos kui äijäl sidä kyzyttäs da kučuttas.
Nygöi bändi yhtelläh on tulemas järilleh. Joukkovehtu nähtäh kezäl kolmel Suomen suurembal festivualil: Provinssis, Ruisrockas da Ilosaarirockas.
Pagin on bändin enzimäzis keikois 16 vuvven väliaijan jälles luguh ottamattah prezidentukandiduatan Pekka Haaviston tugikonsertua vuvvennu 2012, kus Ultra Bra oli soittanuh da pajatannuh.
Bändin säveldäjän da pianistan Kerkko Koskizen mugah järillehtulendan taga-alal on pättävy aigu.
– Meijän bändis on muga äijy ozanottajua, gu ainos on olluh kelgi levy varustettavannu libo migi muu moine. Vastebo tänä vuon muzikantoin aigulistat päitih yhteh da terväzehgi oli luajittu piätös gastrolilois. Nygöi on se hyvä aigu, konzu voizimmo tovengi lähtie soittamah da pajattamah festivualiloile, sanou Koskinen tiijoittehes.
Vuvvennu 2002 vuitti Ultra Bran -bändin ozanottajis perusti Scandinavian Music Group -joukkovehen, kudai iellehgi on aktiivine eigo se ole loppemas omua toimindua.
Luve sežo