Yle Sámi hoavda Pirita Näkkäläjärvi lea odne bearjadaga cealkán iežas eret Yles.
– Giittán din dáid jagiid ovddas! Lean hui rámis das, maid mii leat olahan ovttas ja mo sámegiel almmolaš bálvalus lea ovdánan buot golmma sámegillii. Eanemus boađán áibbašit min bargovuoiŋŋa ja buriid bargoskihpáriid, din! Munnje báhcet dušše liegga muittut min doaimmahusa árgabeaivvis, Näkkäläjärvi giitá Yle Sámi doaimmahusa reivvestis.
Pirita Näkkäläjärvi álggahii Yle Sámi hoavdan 2012. Son lea mannan čávčča rájes leamaš oahppoluomus Londonis London School of Economics -skuvllas ja su sadjásažžan lea Yles doaibman Maria Saijets.
Dál Näkkäläjärvi áigu vuodjut iežas magisttarloahppabargui, mii gieđahallá sámiid sátnefriijavuođa Suomas. Čakčat Näkkäläjärvi sirdašuvvá PwC Strategy& -fitnodaga bálvalussii.
Pirita Näkkäläjärvi hoavdabaji áigge Yle Sápmi buvttadišgođii earret eará iežas tv-ođđasiid Yle Ođđasat, nuoraid radioprográmma Sohkaršohka golmma sámegillii, anáraš- ja nuortalašgiel neahttaođđasiid, Sámi válgagalleriija, Dearvva-radiosáddaga ja Sámi Ealli arkiivva.