Anára Njuorjoluovttas ordnejuvvojit 7.–16.8.2017 duiskalaččaid nuppi máilmmisoađi áigásaš soahtefáŋgaleairra arkeologalaš roggamat.
Roggamiid ordne sámemusea Siida ja Oulu ja Helssega universitehta oktasaš dutkanfidnu, man namma lea "Lappi sevdnjes kulturárbi". Diibmá seamma prošeakta ordnii nuppi máilmmisoađi áigásaš duiskalaš soahtebuohcceviesu bázahusaid roggamiid Anáris.
– Njuorjoluovtta soahtefáŋgaleairras barge sovjetlihttulaš ja eará soahtefáŋggat, ja olbmot geat ledje bággejuvvon bargat geaidnobargguid ja vuovdebargguid. Guovllus lea maiddái soahtefáŋggaid hávdi, Helsset universitehtas muitait.
Historjjá dutki Lars Westerlund navdá Njuorjoluovttas lean maiddái duiskalaččaid ráŋggáštusleairra, Polarstraflager, mas dolle fáŋgan ruoššajuvddálaš soahtefáŋggaid. Dan, leago dat duohta, geahččalit dál čielggadit.
Álbmot sáhttá oahpásmuvvat roggamiidda báikki alde ja sosiála media bokte
Dutkiid ja studeanttaid lassin rogganbargui oassálastet eaktodáhtolaš roggit, geat leat almmuhan iežaset mielde ovddalgihtii.
Álbmot beassá hálidettiin oahpásmuvvat roggamiidda báikki alde. Vuodjinrávvagiid báikki ala sáhttá jearrat Sámemusea Siidda bileahttavuovdinsajis. Dan lassin roggamiid sáhttá čuovvut Facebookis Lapland's Dark Heritage -siiddus, Twitteris ja Instagramis fáddágilkoriin #InariDig ja dutkanfidnu iežas bloggas.
Sámemusea Siiddas ordnejuvvojit maiddái rabas logaldallamat arkeologalaš gieddebarggu birra ja oahpásmuvvanmátkkit Gápmasa ja Gáregasnjárgga soahtehistorjjálaš čuozáhagaide.