Tazah kaheksa vuottu tagaperin 27.11.2009 silloine tazavallan prezidentu Tarja Halonen allekirjutti azetuksen, kudamas karjalan kieldy enzimästy kerdua mainittih ei-alovehellizennu vähembistökielenny. Tostu vuottu Karjalan kielen päiviä pietäh juuri sinä piän: se ukuazu on olluh suuri askel kohti karjalan kielen tilan parandamistu.
Päivännouzu-Suomen yliopiston Kiännä!-projektu on jullannuh Karjalan kielen päivän kunnivokse Jovensuun keskilinnan kartan, kuduas uuličat da muut merkičendät ollah karjalan kielel.
– Taga-alal on duumavo sih näh, mittuine olis Pohjas-Karjalan kielimaizemu, pyzynys aloveh karjalankielizenny, sanou projektan johtai, suomen kielen professoru Helka Riionheimo.
Kartu luajittih käyttämäl kolmie piämurrehtu
Vaste luajitus kartas kaduloin nimii on kiännetty livvinkarjalan, vienankarjalan da suvikarjalan murrehpiirdehii käyttäjen.
– Erähät karjalankielizet aktivistat sanotah tädä kieldy keskikielekse, sendäh gu se huomavoiččou kai karjalan piämurdehet. Testiiruičemmo sidä, kui rahvas otetah vastah moizen eksperimentan, sellittäy professoru Helka Riionheimo.
Joga uuličan nimen kohtal olemmo kaččonuh, min piämurdehen piirdehii voizimmo käyttiä.
Natalia Giloeva
Suvikarjalan kirjukieldy ollah vaste luadimas, ga se sežo tahtottih huomavoija kartan luadijes.
– Pahakse mielekse suvikarjalua vie ei ole normiiruittu, ga sengi tahtoimmo ottua huomavoh. Joga uuličannimen kohtal olemmo kaččonuh, min piämurdehen piirdehii voizimmo käyttiä, sanelou kiännösty luadimas olluh karjalan kielen specialistu, tutkii Natalia Giloeva.
Sanokkua omii mielii!
Nygöi Kiännä!-projektas tahtottas tiediä, midä mieldy kartah näh ollah rahvas.
– Julguammo kartan Kiännä!-projektan blogah (siirryt toizeh palveluh). Vuotammo teijän mielii! Kačommo sit, toinah kentahto ehoittas muutoksii. Tämä on vaste ehoitus, korostau Giloeva.
Giloeva kiändäy da lugou sežo Ylen da Karjalan kielen seuran yhtesruavos luajittavii karjalankielizii uudizii.
Luve ližiä karjalankielizih kavunnimilöih näh piettylöis paginois:
Joensuuhun haluttaisiin karjalankielisiä tienviittoja – kaupunki haraa vastaan
Vähemmistökieli karjala yleistyy kylteissä Pohjois-Karjalassa
Luve sežo
Tänään juhlitaan karjalan kieltä – Tältä näyttävät Joensuun keskustan kadunnimet karjalaksi