Njuike sisdoaluide

Dál lea vuot áigi lávlut čábbámus juovlalávlagiid – ovdalávlu Maria Aikio: Somá go fas beassá ovttas olbmuiguin lávlut

Čábbámus juovlalávlagiid lávlot sámegillii nu Sámis go maiddái gávpogiin Turkus, Helssegis, Tamperes ja Oulus.

Maria Aikio vuordá gealdagas, ahte beassá vuot lávlut čábbámus juovlalávlagiid Turku duopmogirkus. Govva: Linda Tammela / Yle
Marianne Ketola,
Linnea Rasmus

Dál adveantaáigge lea fas áigi lávlut čábbámus juovlalávlagiid. Dán jagi ávvudit čábbámus juovlalávlagiid 50 jagi, ja dan gudnin leat almmustahttán ođđa sámegiel čábbámus juovlalávlagiid gihppaga. Das leat juovlalávlagat golmma sámegillii: nuortalašgillii, anárašgillii ja davvisámegillii.

Otne duorastaga čábbámus juovlalávlagiid lávlot Turku duopmogirkus. Dát lea dál njealját geardi, go Turkus ordnejit čábbámus juovlalávlagiid lávlundilálašvuođa.

Oktan ovdalávlun doppe lea Maria Aikio. Son lea mánnávuođa rájes fitnan čábbámus juovlalávlagiid lávlumen Ohcejogas. Čábbámus juovlalávlagat buktet sutnje juovlamiela ja ráfi.

– Dat lea dehálaš dilálašvuohta, ja somá go fas beassá ovttas olbmuiguin lávlut. Guokte jagi das mannege korona dihte, nu ahte striimejuvvui dat dilálašvuohta.

Aikio muitala, ahte vuosttas háve Turkus lágiduvvon čábbámus juovlalávlagiid dilálašvuhtii bohte olu olbmot. Buohkat sis eai vealttakeahttá hupman sámegiela, muhto sii ledje beroštuvvan guldalit ja lávlut sámegillii.

– Gal das sáhttá seammás áibbas bures lávlut, vaikko ii livččiige hállan sámegiela, go dashan gullá, mot daid galgá lávlut, dadjá Aikio.

Wimme Saari loaiddastii Turku duopmogirku čábbámus juovlalávlagiid lávlundilálašvuođas jagis 2019. Govva: Linda Tammela / Yle

Oaivegávpotguovllus maid lea vejolašvuohta lávlut čábbámus juovlalávlagiid sámegillii sotnabeaivve Helssega duopmogirkus.

Dilálašvuođa jođiha Mari Valjakka ovttas duopmogirkosearvegotte báhppa Yrjö Ikoneniin.

Mari Valjakka liiko hirbmat olu čábbámus juovlalávlagiin. Dalle go son barggai sámebáhppan, sus ledje olu lávlundilálašvuođat. Dál go son lea virgelobis, go bargá prošeaktaplánejeaddjin Sápmelaččat girkus -prošeavttas.

Valjakka mielas lea dehálaš beassat lávlut ja deaivat olbmuid.

– Mu mielas lea ihána, go leat dakkár dilálašvuođat. Miihan lávlut hirbmat ollu unna gilážiin maiddái, ahte eat dušše Avvila ja Anára girkus, muhto maiddái Njellimis, Keväjärvis, Čeavetjávrris ja vehá juohke guovllus. Dat lea dakkár dehálaš ášši maiddái beassat deaivvadit eará olbmuiguin.

Mari Valjakka okta jiellat juovlalávlla lea Sámi juovllat. Govva: Anneli Lappalainen / Yle

Muhto goas de sáhttá lávlut ovttas čábbámus juovlalávlagiid? Dása leat čohkken dilálašvuođaid, gos daid lávlot Sámis dahje sámegillii.

Gávpogiin

du 1.12. dii. 19 Turku duopmogirkus sámegielat čábbámus juovlalávlagat

so 4.12. dii. 16 Helssega duopmogirkus sámegielat čábbámus juovlalávlagat

15.12. dii 18 Oulu duopmogirkus sámegielat čábbámus juovlalávlagat

20.12. dii 18 Tampere Pyynikki báhppalis sámegielat čábbámus juovlalávlagat

Anáris

vu 5.12. dii. 19 Suoločielggi kapeallas

ga 7.12. dii. 18 Menešjávrris Pirkko ja Yrjö Mattus geahčen

so 11.12. dii. 14 Anára girkus

vu 12.12. dii. 17 Rivdolis Marjut Norokorpi ja Ilpo Paananen geahčen

ma 13.12. dii. 17 Bárttehis Eeva Seurujärvi geahčen

ga 14.12. dii. 17 Nellimis ortodoksagirkus suoma- ja sámegillii

ga 14.12. dii. 17 Suoločielggis Aurora-stobus

ga 14.12. dii. 18 Keväjärvis ortodoksa-tsasounas

du 15.12. dii. 17 Anáris Siidda olgomusea lávus sámegillii

be 16.12. dii. 18 Tolonenis Tolosen Pirttis

lá 17.12. dii. 12 Leammis Gábe-Jovnna báikkis suoma- ja sámegillii

so 18.12. dii. 18 Avvila girkus

vu 19.12. dii. 9.30 Avvila girkus mánáid juovlalávlagat ja dii. 12 Avvila vuolleskuvlla juovlalávlagat

ma 20.12. dii. 9.30 Anára girkus mánáid juovlalávlagat ja dii. 11.30 Anára skuvlla juovlalávlagat

du 22.12. dii. 9.30 Čeavetjávrri skuvllas

Eanodagas

be 2.12. dii. 17 Duottar-Sámi luondduguovddážis

vu 5.12. dii. 18 Gilbbesjávrri máŋggadoaimmadálus

du 8.12. dii. 18 Heahtá girkus

vu 12.12. dii. 13 Heahtás searvegotteviesus

ga 14.12. dii. 17 Heahtá girkus sámegielat čábbámus juovlalávlagat

du 15.12. dii. 13.30 Heahtás Luppokoti-boarrásiidviesus

du 15.12 dii. 18 Gárasavvona kapeallas čábbámus juovlalávlagat sáme- ja suomagillii

be 16.12. dii. 18 Bealdovuomi boares skuvllas

ma 20.12. dii 18 Bálojohnjálmmi giliviesus

ga 21.12. dii 18 Leaibejávrris Kelotin Rantamajain

du 22.12. dii. 18 Heahtá girkus

Ohcejogas

lá 3.12. dii. 14 Ohcejoga skuvlla lihkadansáles čábbámus juovlalávlagat juovlamárkaniid áigge

vu 26.12. dii. 11 Gáregasnjárgga kapeallas Čábbámus juovlalávlagat -sátneipmilbálvalus.

Vuohčus

so 18.12. dii. 14 Vuohčus guovttegielat meassu ja čábbámus juovlalávlagat Vuotson Majas

Cavgil midjiide čujuhussii sami.radio(a)yle.fi, jus dieđát eambo čábbámus juovlalávlagiid lávlundilálašvuođaid Sámis dahje sámegillii.

Ođđasamosat: paketissa on 10 artikkelia