Njuike sisdoaluide

Čielggadeimmet: Mat leat dat vehádagat vehádaga siste, main leamaš sáhka sámediggelága oktavuođas?

Sámediggelága oktavuođas gevvon ságastallamiin leat gullon hállamin vehádagain vehádaga siste. Geahččalat dás čilget, mat dat leat.

Yle Sámi doaimmaheaddji Susanna Guttorm geahččala čilget, mat leat vehádaga vehádagat, main leat hállon sámediggelága oktavuođas.
Susanna Guttorm

Sápmelaččaide guoskevaš neahttaságastallamiin ja maiddái politihkkariid njálmmis leat gullostan maŋimuš áiggiid čujuheamit vehádagaid vehádagaide, namalassii anáraččaide ja meahccesápmelaččaide. Muhto mat dát vehádagaid vehádagat leat? Rájá geassin joavkkuid gaskii lea váttis, muhto geahččalat čilget dan.

Nuortalaččat, anáraččat ja davvisámegielagat

Sápmelaččaid sáhttá Suomas roavvádit juohkit golmma giellajovkui: nuortalaččat, anáraččat ja davvisámegielagat. Iešguđet giellajoavkkuide gullevaš olbmot leat maid náitaladdan eará giellajoavkkuid olbmuiguin. Máŋgga ovdamearkka dihtii davvisámegielat olbmos sáhttá leat jogo áhkku dahje áddjá nuortalaš, dahje vaikkoba eadni dahje áhčči anáraš.

Davvisámegielagat orrot viidát olles sámeguovllus. Anáraččat leat árbevirolaččat ássan Anára guovllus ja nuortalaččat sirdojuvvojedje sođiid maŋŋá ovddeš Suoma, dálá Ruošša guovlluin Anárii.

Meahccesápmelaččat vai meahccelappalaččat?

Muhto naba meahccesápmelaččat dasto, geat sii leat? Gažaldagas lea oalle ođđa ášši, doaba gullogođii almmolašvuođas logemat jagi dassái. Ovdal dan hálle maiddái meahccelappalaččain.

Meahccesápmelašvuođas leat iešguđetlágan dulkomat. Muhtimiid mielas meahccesápmelaččat leat giela massán boares lappalašsogaid maŋisboahttit ja nappo iežas sápmelaš joavku. Muhtimiid mielas fas meahccesápmelašvuohta lea hutkojuvvon doaba, mainna govvidit olbmuid, geat hálidit sámedikki válgalogahallamii máŋga čuohtejagi dassái eallán máttuid bokte, geat boares áššegirjjiid mielde leat bargan lappalaš ealáhusaiguin.

Ođđasamosat: paketissa on 10 artikkelia