Njuike sisdoaluide

Festiválat dárbbašit eaktodáhtolaččaid bargonávccaid – Skábmagovain sii huksejit muohtateáhtera ja vuvdet bileahtaid

Eamiálbmogiid filbmafestivála Skábmagovat ordnejuvvo dál fas áitosaš festiválan Anáris Davvi-Suomas. Ordnejeaddjit ohcet dál eaktodáhtolaččaid veahkkin filbmafestiválii.

Skábmagovat filbmafestivála jođiheaddji Aleksi Ahlakorpi lohká, ahte bileahtaid vuovdimii ja dárkkisteapmái leat álkes rusttegat. Govva: Kirsti Länsman / Yle
Inger-Elle Suoninen

Anára girkosiidii bohtet vahkkoloahpas guossit miehtá máilmmi, go Skábmagovat eamiálbmogiid filbmafestivála geasuha filbmaberošteddjiid Sápmái. Festivála ordnemat leat juo buori muttus, muhto ain lea dárbu eaktodáhtolaš bargiide, muitala festivála jođiheaddji Aleksi Ahlakorpi.

– Mis goit bileahtaid vuovdimii dárbbaša álot veahá veahki ja dathan lea álkes bargu. Váikko orru, ahte bargovuorru njeallje diimmu sáhtašii leat guhki, de iihan dat iešalddes leat, lohká Ahlakorpi.

Sámis ordnejit ollu iešguđetlágan festiválaid. Eaktodáhtolaš bargit leat guovddážis daid dáhpáhusaid ollašuhttimis ja ovdal festiválaid lávejitge viidát dieđihit makkár dárbbut eaktodáhtolaš bargiide lea. Muhtumin sáhttá leat váttis gávdnat doarvái olbmuid geat leat beroštan bargat eaktodáhtolažžan. Ovdamearka dihte jagis 2019 Ijahis idja -musihkkafestivála heaibbui dainna, ahte eai meidnen gávdnat doarvái eaktodáhtolaš bargiid.

Eaktodáhtolaččat veahkehit iešguđetlágan bargguin

Skábmagovat filbmafestivála lea maŋimus guokte jagi leamašan neahtas koronavirus- dahjege COVID-19-pandemiija dihte, ja dál moatte jagi bottu maŋŋá olbmot besset fas Anárii baikki ala geahččat filmmaid. Filmmaid čájehit Sámekulturguovddáš Sajosis, Sámemusea ja luondduguovddáš Siiddas ja Skábmagovaid várás huksejuvvon muohtateáhteris.

Eaktodáhtolaččat leamašan mielde iešguđetlágan bargguin, dego veahkkin hukseme muohtateáhtera. Festiválaid áigge eaktodáhtolaččaid veahki dárbbašit bileahtaid vuovdimis ja dárkkisteamis. Vaikko filmmat čájehuvvojit maiddái olgun dáhpáhuvvá bileahtaid vuovdin siste.

Skábmagovat filbmafestiválas eaktodáhtolaččat ožžot bálkán liegga borramuša ja ealligovvabileahtaid. Ahlakorpi muitala, ahte daid lassin eaktodáhtolaččain lea vejolaš mannat geahčat filbmačájáhusaid, mat eai leat áibbas dievva.

– Máŋggain eará festiválain maiddái dákkár vuohki, de mii maiddái geavahit dien.

Dál Skábmagovat filbmafestiválii dárbbašit šat bileahtta vuvdiid ja dárkkisteddjiid. Filbmafestivála dáhpáhusaide lea vejolaš oastit juo dál bileahtaid neahtas, muhto juohke čájáhussii beassá oasit bileahtaid maid ovdal filmma čájeheami. Ahlakorpi muitala, ahte bileahtaid vuovdimii ja dárkkisteapmái gávdnojit rusttegat, nuba eaktodáhtolaččat eai dárbbat bearehaga ođđa áššiid dan várás oahppat.

Skábmagovaid eaktodáhtolaš bargin sáhttá ohcat earret eará skovi bokte mii gávdno dáhpáhusa neahtasiidduin (siirryt toiseen palveluun).

Skovvái galgá deavdit iežas dieđuid ja doppe beassá maid válljet makkár barggu millosepmosit bargá. Molssaeaktun leat áššehasbálvaleapmi, ofelastin, bileahtaid vuovdin, sosiálalaš media vai skábmaklubbas bevddiid čorgen.

Ođđasamosat: paketissa on 10 artikkelia