Anna Näkkäläjärvi-Länsman lávke studioi ja su olles leahkin molsašuddá. Máŋgasat dovdet su musihkarin, muhto dál son ii álgge lávlut baicce hupmá. Näkkäläjärvi-Länsman lea luoikan jienas Mumenvákki Filijoŋkái, ja vaikko dalán Filijoŋkká jiena ii soaitte dovdat su jietnan, lea dán rollii njuiken leamašan álki.
– Mu siste lea várra veahá dakkár Filijoŋká, ahte mun gávnnan dan gal doppe. Dieđusge son čájeha ollu dovdduid, de mun jurddašan nu, ahte dat lea dalle álki, mun in dárbbaš doallat iežan siste maidege. Mun beare divttán boahtit olggos, lohká Näkkäläjärvi-Länsman.
Studios čohkká jietnaneavttára lassin bagadalli, teknihkkár ja giellameašttir. Prošeaktajođiheaddji ja bagadalli Susa Saukko leamašan mielde buvttadeamis jo ovddit bajiid ja lea oaidnán neavttáriid ovdáneami.
– Buohkat leat ovdánan olu. Oktan sivvan lea dat, ahte buohkat leat vuolgán roahkkadit mielde ja čatnasan olles persovnnain ja váimmuin. Danin mis lea buorre teama, lohká Saukko.
Anna Näkkäläjärvi-Länsman ii vuolgán dán prošektii bálkká dihte, muhto danin, go son muitá árat sámegielat Mumen-animašuvdnaráiddu ja lohká dan báhcán bures millii.
– Mun jurddašin, ahte dát lea juoidá maid mun háliidan iskat. Dieđusge danin go mu mielas dat Mumenvággi ja dat ovddit Mumen-animašuvdnaráidu leat oalle legendáralaččat dahke klassihkkarat, Näkkäläjärvi-Länsman lohká.
Dubbenstudio lea dál Anáris
Mumenvákki goalmmát sesoŋŋa dubbemiid báddemat leat dál jođus. Árat guokte sesoŋŋa báddejuvvojedje Helssegis, muhto dál Anárii lea huksejuvvon dubbenstudio. Saukko muitala, ahte vuosttaš háve son leamašan jagis 2017 Anáris skuvleme dubbema ja de leat ovddidan fidnu, man ulbmilin lea, ahte Sápmái boađálii dubbeninfra ja bissovaš vuođđu dubbenbargui.
– Dál mii leat dan muttus, ahte mis lea studio ja sávvat, ahte dat bissu ja ahte dasa lea dárbu dán prošeavtta maŋŋá, lohká Saukko.
Prošeavttas barget sullii 50 olbmo. Buohkat earát leat Sámis eret earret prošeaktajođiheaddji Susa Saukko. Son jáhkká dan geahpedit barggu, go dubbenstudio lea Sámis.
– Go olbmot bohtet lagaš guovlluin ja buohkat dovdet nubbi nuppi, nu galhan dat lea eanet lotkat. Dieđus go leat bargan dáinna juo árat ja olbmot dihtet maid dahket, nu dat lea eanet lotkat. Gal mun vásihan, ahte olbmot leat ilus, go studio lea dáppe iige dárbbat mátkkoštit guhkás, Saukko lohká.
Mumenvákki ođđa sesoŋŋa čájehuvvo TV:s boahtte čavčča Unna Junná prográmmabáikkis.