Tiina Sanila-Aikio moštt võl-i tõn, ǥu suu nijdd šõõddi.
– Mon leʹjjem toʹben Ruäʹvnjaarǥâst puõccipõõrtâst da muʹst leʹjje lääʹddǩiõllsa oummu toʹben pirr. Muäna mainstim källsain lääʹddǩiõl da tõʹst leäi tõt podd, ko õõlǥi vaajted ǩiõl.
Ååʹn 40-ekksaž Sanila-Aikio mušttal, ǥu suu nijdd leäi suu ââʹsǩest da son fiʹttji, mõõn tääʹrǩes ǩiõllserddmõš lij. Teʹl Sanila-Aikio tuʹmmai, što jõs son ij ååʹn ääʹlj mainsted säämas suu päärnain, teʹl son ij ääʹlj ni kuäʹss.
– Da kâʹl leäi fiinâs ǩiõččâd tõn muu niõʹđe da suu sääʹmǩiõl mainstummuž, son mušttal.
Päärna šõddmõš lij tåʹlǩ õhtt äʹšš, koon ǩiõttʼtõõlât Sanila-Aikio jieʹllmest ođđ dokumeeʹntest Paavvâl Taannâl Tiina, “Rock-Säʹmmlaž”.
Ohjjeei Ritva Torikka lij fiʹlmmjam Sanila-Aikio eeʹjjest 2005
Ritva Torikka leäi teʹl võl nuõrr tååimteei, ǥu son jooʹđi tuâjjtaaurõõžžin Čeʹvetjääuʹrest. Čeʹvetjäuʹrrneeʹǩǩ leʹjje suu miõlâst ääv da lääskvõs oummu.
– Toʹb leäi nåkam jiõgg, koon toʹbddem, ǥu vuõinnlõʹttem Tiinain teʹl, ǥu son leäi nuõrr rockneǩ. Tõt tuejjii muʹnne vaikktõõzz da haaʹleem tuejjeed suʹst fiiʹlm, Torikka mušttal.
Torikka da Sanila-Aikio tåʹbdde sami puârast da tõn diõtt Torikka tuõsti da silttii kõõččâd Sanila-Aikiost joba vaiʹǧǧes aaʹšši pirr. Måtam ääʹšš lie leämmaž nåkam, koin Sanila-Aikio ij leäkku vuäittam mainsted.
– Õhtt nåkam podd kuâsttai še tõn dokumeeʹntest, što ouddmiârkkân muu eeʹjj pirr muʹst lij sami vaiggâd mainsted, Sanila-Aikio maainast.
Piârjieʹllem lââʹssen dokumeeʹntest kuâsttai Sanila-Aikio rock-musiikk da puäʒʒhååid tääʹrǩesvuõđ. Son lij politiikkâr, ǩiõlltuâjjlaž da son maainast jiânnai ǩiõllaaʹšši pirr.
Torikka lij piâssâm seuʹrrjed Sanila-Aikio da suu jieʹllem tääʹrǩmõs pooddid.
– Lij leämmaž miõl ǩieʹssi vueiʹnned, mäʹhtt nuõrr neezznest šâdd jieʹllem ǩiõččlâsttmõõžži mieʹldd vuõrâsooumaž, Torikka maainast dokumeʹntteeʹjjin.
Håʹt-i Sanila-Aikio jieʹllem lij mottjam; son lij näittlõõttâm, suʹst lij šõddâm jeäʹnn da son lij leämmaž Sääʹmteeʹǧǧ saaǥǥtuõʹllʼjeeʹjen, Sanila-Aikio kuuitâǥ vuäinn, što mii-ne seämma käunnai.
– Kâʹl mon ååskam, što jurddji peäʹlest leäm miâlggâd seämma ooumaž, leâša ǥo leäm šõddâm jeäʹnnen da vasttõsvuõđ lie lâssnam tõt še teâđast vaaikat ooumže, Sanila-Aikio särnn.
Dokumeeʹnt maaiʹlm vuõssmõs čuäjtõs lij leämmaž Skábmagovat-fiʹlmmfestivaalâst piâtnâc 27.1. Nuʹbb čuäjtõs lij pâʹsspeeiʹv čiâss 14.00 Siidast.