Sámis lea dáid áiggiid sáhttán oaidnit filbmamáilmmi beakkálmasaid. Michelle MacLaren bagadallan psykologalaš soaiggusfilmma govvejit vel dán ja boahtte vahkus Anára ja Avvila guovlluin.
MacLaren lea dovddus bagadalli ovdamearkka dihte The X-Files, Game of Thrones ja Breaking bad -ráidduin. Earret eará Noomi Rapace ja Jonathan Banks neaktiba filmmas.
Constellation-ráiddu leat govven viđa riikkas. Sámis govvemiidda leat oassálastán 220 filbmamáilmmi ámmátolbmo. Govvemiin leat ávkašuvvan báikkálaš fitnodagat 1,7 miljon euroin.
– Dat lea sihkkarit stuorámus buvttadeapmi, maid leat goassige belohahkii govven Suomas, dadjá Film Service Finland márkanastinhoavda Anni Wessman.
Constellation-ráidu almmustuvvá Apple TV+ neahttarávdnjenbálvalusas loahppajagi 2023. Ráiddu buvttada Turbine Studios. Suomas buvttadeamis fuolaha Film Service Finland.
Govvemat buktet dietnasa báikkálaš fitnodatdoalliide
Báikkálaččaide tv-ráiddu govvemat leat dagahan hehttehusaid geaidnojohtolagas, go daid geažil johtolaga leat gaskkohagaid bissehan. Nuppe dáfus govvemiin leat ávkašuvvan báikkálaš fitnodagat.
– Sullii 1,7 miljon euro gollá bálvalusaide ja gálvvuide, maid oastit báikkálaš fitnodagain, nappo idjadeapmi, borramuš, biila- ja mohtorgielkkáid láigoheapmi, huksenmateriálat ja elrávdnje- ja viessogolut, muitala Wessman.
Sápmi válljašuvai Constellation-ráiddu govvenbáikin heivvolaš govvensajiid geažil. Buvttadeami govvenbáikelágideaddji Ilkka Mukkala muitala, ahte dagai vuosttas bargotuvrras Anárii juo 1990-logu álggus.
Orrunsajiid lágideapmi stuorra buvttadanjovkui báresáigodaga leamašan váttis ja oassi joavkkus lea idjadan gitta Gáregasnjárggas. Buot lea goit mannan bures ja buohkat leamašan duhtavaččat.
– Ráiddu bagadalli Michelle MacLaren lea alimus dási bagadalli Hollywoodis. Son lea hui ilus dán guovllus. Das, makkár duovdagat dáppe leat, ja mo buot bálvalusat leat doaibman. Jáhkán son máidnu dán birra ain viidásut, ja nu son lea ieš maid lohkan, Mukkala dadjá.
Buvttadanjoavkku duđavašvuhtii leat váikkuhan maiddái báikkálaš luondu ja dorvvolašvuohta.
Mukkala lea leamaš mielde stuorámus suopmelaš tv-ráidduid buvttadeamis, nu maiddái Ivalo nammasaš ráiddu govvemiin. Ráiddus govvejit dál juo goalmmát sesoŋŋa.
Av-buvttadandoarjja hohkaha Supmii riikkaidgaskasaš govvemiid
Supmii hohkahallet riikkaidgaskasaš filbma- ja tv-buvttademiid audiovisuála buvttadandoarjagiin.
– Buvttadeamit, mat bohtet Supmii govvet, ja maiddái stuorát ruovtturiikka buvttadeamitge, ožžot Business Finlandis máksobuhtadusa. Nappo go dat golahit ruđa báikkálaččat, sidjiide mákset ruovttoluotta 25 proseantta, čilge Wessman.
Sápmi leat bivnnut maiddái suopmelaš filbmaindustriijas. Juovlamánus ilbman filmmaid Napapiirin sankarit 4 ja Sisu govvejedje Sámis ja Davvi-Suomas.