Savo-Karjalan valličuspiiris ehoitetunnu on 48 pienien puolovehien kandiduattua. Niilöin puolovehien kannatandu jälgimäzis parluamentuvalličuksis oli vähem kahtu prosentua.
Nygöi Arkadianmäile pyrgijiä on kaheksas pienes puolovehespäi. Niilöis Liikeh Nygöi -puolovehel da Valdu kuuluu rahvahale -puolovehel on kudualgi yksi kanzanevustai nygözes parluamentas.
Enämbi ehoitettuu Savo-Karjalas on Liikeh Nygöi -puolovehel, 13.
Toizekse enämbi kandiduattua on azetannuh Vällyön liitto, kymmene, da Valdu kuuluu rahvahale -puoloveh, kaheksa.
Liberualoil da Suomen Kommunistizel Puolovehel kudualgi on valličuspiiris viizi ehoitettuu da Piruattupuolovehel nelli.
Kristallipuoloveh on azetannuh kaksi da Elättioigevuspuoloveh yhten kandiduatan.
Kristallipuoloveh da Vällyön liitto ollah valličusliitos.
Iellizis parluamentuvalličuksis vuvvennu 2019 oldih Savo-Karjalas keräl Liikeh Nygöi, Piruattupuoloveh da kaksi kommunististu puolovehtu.
Silloi net suadih kaikkiedah nenga 4 500 iändy, kudamis 75 prosentua kerättih Liikeh Nygöi -puolovehen kandiduatat.
Valličusprogrammua joga čurah
Savo-Karjalan valličuspiiris ehoitettuloi keviän parluamentuvalličuksis azetannuot pienet puolovehet ollah keskenäh eriluaduzet.
Liikeh nygöi tundietah biznesmiehen Harry Harkimon puolovehennu, kudaman valličusprogrammas korostutah talovusdielot. Mulloi puolovehregistrah merkitty Vällyön liitto ilmoitahes oigielistoluaduzekse da korostau omas programmas vällytty eri muodolois.
Valdu kuuluu rahvahale -puoloveh tahtou paiči muudu ližiä mostu kohtinastu demokratiedu, kui rahvahaniänestyksii. Ristikanzanvällytty korostai Piruattupuoloveh vastustau pidoyhteskundua da on avvonazen demokratien puoles.
Suomen Kommunistine Puoloveh, kudual on piäl sadavuodine histourii, čakkuau omas valličusprogrammas Natuo da kapitalizmua sego vuadiu ližiä dengua rahvahan hyvinvoindah niškoi. Liberualupuoloveh korostau vällytty valita da ezittäy iččeh valličusprogrammas äijän leikkavuskohtastu.
Kristallipuoloveh miärittelöy iččie omas valličusprogrammas enne kaikkie hengizekse puolovehekse.
Lajisorduo vastustai Elättioigevuspuoloveh on sidä mieldy, gu ymbäristöprobliemat liitytäh enne kaikkie elättilöin ebäoigevuonjyttyzeh kohtavundah.
Pienpuolueista pyrkii Savo-Karjalan vaalipiiristä lähes 50 ehdokasta kansanedustajaksi