Tulien kezän Jyväskylä suau uvven kogo perehen monitaidofestivualin. 9.–11. kezäkuudu enzimästy kerdua piettävy kolmepäiväine LystiKylä-festivuali on tarkoitettu enne kaikkie lapsekkahile perehile.
Pivon programmas on konsertua, teatrua, tansii da taidoruadopajua. Keräl ollah paiči muudu lapsienmuuzikanorkestru Loiskis, Pikku Papun orkestru da Pikku Kakkozespäi tutut Maltti da Valtti.
Festivualin luajitah Jyväskylän linnan kul’tuurupalvelut yhtes suuren yhtesruadoverkoston kel. Pidokohtinnu ollah paiči muudu Jyväskylän linnankirjasto, Kul’tuurutaloi Villa Rana, Veturitallit, linnanteatru, keskilinnan alovehen muzeit da laukkukeskukset sego Mäki-Matin perehpuusto da Lounaspuusto.
Piätiemannu tapahtumas on elätit, mi nägyygi programmas. Keräl on figuurua Villakoirazes böbökkyhotellin eläjissäh. Programmukogonažus on luajittu nenga 0–12-vuodizih lapsih niškoi perehinneh.
Pidoh kuuluu kui maksottomua, mugai maksollistu programmua.
LystiKylä-festivuali pruaznuiččou sežo alovehellistu lapsienkul’tuuruyhtesruaduo. Kul’tuuruaittu on kymmenen keskisuomelazen kunnan lapsienkul’tuuruverkosto, kuduale tänä vuon roih 20 vuottu.