Ohcejohkalaš ráppár Mihkku Laiti eallimis muitaleaddji ealligovva Guovssahasaid ráppár - Revontulten räppäri jorrágoahtá Suoma ealligovvateáhteriin 24. njukčamánu. Ealligovas čuvvot Laiti eallima Ohcejogas dalle, go son oassálasttii Talent-gilvui ja finastii loaiddasteamen stuorra publikumma tv-prográmma lávddi alde. Seammás son eallá goit dábálaš nuorra badjeolbmo árgga ja guorahallá, maid son áigu boahttevuođas.
Filmma lea bagadallan Petteri Saario, guhte lea máŋgasiidda oahpis Ohcejoga Beckhamat -ealligovas, mii almmustuvai 2010. Son ii máhte vuos dadjat, áigugo joatkit sámi olbmuid eallima dokumenterema, muhto dat lea vejolaš.
– Mu geasuha olbmuid, birrasa ja luonddu gaskavuohta, Saario lohká.
Saario mielas ii-sápmelaš sáhttá bures bargat ealligova sápmelaččas, eamiálbmotvuođas dahje sápmelašvuođas. Dehálamos lea Saario mielde dat, mo daid áššiid gieđahallá ja mo filmma dahká.
– Mun in leat dán ealligova barggadettiin vásihan ollenge, ahte livččen olggobeale olmmoš. Lean dovdán Mihku dan rájes, go son lei viđa jahkásaš, lean Mihku unna vielja ristáhčči ja dovddan bearraša hui bures. Dát lea dahkkon ovttasbarggus, Saario muitala.
Ealligova duogážis lea muitalus sámegiela mearkkašumis
Guovssahasaid ráppár -ealligova ráhkadeaddjiide leamaš dehálaš, ahte ealligovva lea namalassii sámegillii ja das gieđahallojuvvo sápmelašvuohta máŋggabealagit. Mihkku Laiti ieš doaibmá ealligova muitaleaddjin, ja dat olles muitalus lea su eatnigillii, davvisámegillii.
– Sápmelažžan mun lean hui čeavlái dás, ahte sámegiella gullo ja oidno dáppe eará sajisge go Ohcejogas, čaibmá ealligova váldonásti Mihkku Laiti.
Filmmas gieđahallet maid máŋggaid sápmelaččaide stuorra fáttáid degomat badjedoalu, sámegiela ja dálkkádatnuppástusa. Filmma dahkkit árvalit geahččijoavkku leat eanemus suopmelaččat ja danin leat háliidan giddet fuomášumi dasa, ahte filmma bokte lasihit dieđu maid dábálaš áššiin sápmelašvuođas.
– Dat lea okta sivva manin ealligovva oppa dáhkkuige, ahte vehá muitalit ja čájehit, makkár dat eallin doppe lea, čilge Mihkku Laiti.
Bagadalli Petteri Saario mielas lei čielga ášši, ahte filbma šaddá sámegillii. Muhtin muttus sii báddejedje earáge gillii veršuvnnaid filmmas, muhto buoremus orui oalát sámegielat veršuvdna. Dušše muhtin ságastallamiin gullo suomagiella.
Saario lohká, ahte sámegiela válljen váldogiellan lei lunddolaš, dasgo Mihkku Laiti maid ráppe sámegillii.
– Doppe lea duogážis čavgasut muitalus giela mearkkašumis, man dehálaš dat máŋgga láhkai lea, dadjá Saario.