Sámediggi válgalávdegoddi ii čáhkadan jienastuslohkui buohkaid sin, geaid alimus hálddahusriekti lea dohko dohkkehan. Válgalávdegotti ságadoalli Aslak Pieski mielde dat guoská oktiibuot 86 olbmo. Sii bohtet oažžut áššis sierra dieđu.
Válgalávdegottis oaivvildit, ahte alimus hálddahusrievtti mearrádusat leat ruossalagaid riikkaidgaskasaš soahpamušaiguin. Danin eai leat čáhkkehan válgalogahallamii buot daid olbmuid, geat leat AHR čovdosiiguin biddjon válgalogahallamii.
– Miihan fertet čuovvut njuolggadusaid ja ráhkadit ortnet mielde dan válgalogahallama, lohká Pieski.
Pieski muitala, ahte válgalávdegotti bargun lea mannat vuođđologahallama čađa. Son muitala, ahte gielda ja stáhtaválggain digi- ja álbmotdieđudoaimmahagas boahtá nu gohčoduvvon vuođđologahallan man vuođul ráhkaduvvo válgalogahallan.
– Mis ii leat dákkár vuođđologahallan ja min vuođđologahallan lea ovddit válggaid válgalogahallan ja dan vuođul mii ráhkadit ođđa válgalogahallama, muitala Pieski.
Pieski jáhkká, ahte sin mearrádusa bohtet váidit. Olbmot geat oidnet, ahte sii leat almma rievtti haga guđđojuvvon válgalogahallama olggobeallái sáhttet ohcat áššis njulgema.
Kari Kyrö leat ovdalge guođđán válgalogahallama olggobeallái
Anárlaš sámedikkeáirras Kari Kyrö jáhkká, ahte son lea okta dain, geaid sámediggi válgalávdegoddi ii čáhkadan dáid válggaid jienastuslohkui. Son ii vel dieđe maid áigu bargat áššiin.
– Válgalávdegotti lea jáhkkimis váldán eret mu ja mu maŋisbohttiid doppe válgalogahallamis lága vuosttásažžat ja dat sáhttá dagahit muhtin doaimmaid. Geahčat dál dagahago, lohká Kyrö.
Alimus hálddahusriekti lea jagis 2011 mearridan, ahte Kyrö galgá bidjot sámediggi válgalogahallamii. Kyrö lohká, ahte sámedikki stivra lea jagiid mielde iskan čuoggut dan mearrádusa.
– Alimus hálddahusriekti lea dárkkistan ON:a cealkámušaid mat leat jagiid áigge boahtán ja gávnnahan, ahte dat mearrádus doallá ja das lea lága fápmu, lohká Kyrö.
Dát ii leat sutnje vuosttaš geardi, go su eai hálit válgalogahallamii. Jagis 2019 Kyrö válde eret válgalogahallamis, go sámedikki geavahii iešnjulgema.
– Dat ahte leat guođđán olggobeallái nu leagoson dat dál nubbi háve, muhto sámedikki stivra lea juo njealje geardde ovdal dán, ohcan alimus hálddahusrievttis mearrádusa burgima, lohká Kyrö.
