Olmmoš, guhte lea ohcan válgalávdegoddái, iige leat vel ožžon sámedikkis breava, sáhttá dárkkistit iežas dieđuid 20.3.2023 rájes. Mannan vahkus buohkat eai vel diehtán leatgo merkejuvvon válgalogahallamii vai eai.
Duorastaga rájes válgalávdegotti mearrádus lea ságastahttán olbmuid. Dalle válgalávdegoddi dieđihii, ahte sii eai leat sirdán boares válgalogahallamis ođđa válgalogahallamii sin, geaid alimus hálddahusriekti lea dohko ovdal lasihan. Mearrádus guoská 86 olbmo.
Válgalávdegotti ságadoalli Aslak Pieski lea ráhkkanan njulgengáibádusaide.
– Mii eat leat šlumppat eatge guovttegávdnái vuolgán dáinna hommáin johtui.
Mearrádusat leat vuđolaččat smihttojuvvon válgalávdegottis.
– Dát ášši ii leamaš oktan puntan. Dat lea juohke okta sierra gehččojuvvon, nu mo galgá, dadjá Pieski.
Pieski čilge vuđolabbot válgalávdegotti mearrádusa
Mannan bearjadaga válgalávdegotti ságadoalli Aslak Pieski muitalii hui oanehaččat Yle Sápmái, ahte dihto olbmot eai leat válgalogahallamis ja válgalávdegottis fertejit čuovvut njuolggadusaid ja ráhkadit ortnega mielde válgalogahallama.
Vuossárgga Pieski čilge vuđolabbot válgalávdegotti mearrádusa.
– Dáshan lea duohken nállevealaheami vuostásaš komitea (CERD). Dan mearrádus bođii mannan geasi. Dat burginohcamušat, maid alimus hálddahusriekti lei hilgon, ledje dahkkojuvvon ovdal go mearrádus bođii, vuođušta Pieski.
– Alimus hálddahusriekti čujuhii jagiin 2011 ja 2015 namalassii CERD ávžžuhusaide ja dalle dat dulkui nu, ahte burginohcamušat eai dalle mannan čađa. Dál CERD lea cealkán, ahte AHR lei dulkon boastut sin rávvagiid, čilge Pieski.
Komitea attii 13.6.2022 čovdosa áššis, mii guoská Suoma alimus hálddahusrievtti (AHR) mearrádusa dohkkehit logiid olbmuid Sámedikki válgalogahallamii Sámedikki válgalávdegotti oainnu vuostá.
– Válgalávdegoddi lea vuosttas ásahus, mii lea dahkan mearrádusa válgalogallamis dien CERD-čovdosa maŋŋá. Alimus hálddahusriekti ii leat váldán diesa oaivila. Dál go mii bijaimet válgalogahallama ortnegii, dál dat beassá váldit oaivila dasa, joatká Pieski.
Alimus hálddahusriekti ii leat ovddalgihtii háliidan kommenteret ášši.
Iežas dieđuid sáhttá dárkkistit ovdal njukčamánu loahpa
Otná rájes lea vejolaš dárkkistit iežas guoski dieđuid, go sámedikki válgalogahallan lea oaidninláhkai sámeguovllu gielddain. Iežas dieđuid sáhttá dárkkistit, geange eará dieđuid ii oainne.
Válgalogahallan lea oaidninláhkai 20.3. – 31.3.2023 beivviid áigge árgan vu-be dmu 14.00 – 17.00 čuovvovaš báikkiin:
- Duottar-Lappi luondduguovddáš. (Heahttá, Peuratie 15)
- Sámekulturguovddáš Sajos, čoahkkinlatnja Silba 1. geardi. (Anár, Sajos, Menesjärventie 2A)
- Ohcejoga gilidállu Giisá. (Ohcejohka, Utsjoentie 9)
- Vuohču skuvla. (Vuohčču, Ivalontie 8716)
Telfonis maid sáhttá jearrat iežas dieđuid birra
Jus dieid báikkiide ii beasa, de juohkehaččas lea vejolašvuohta dárkkistit iežas guoski dieđuid, mat leat merkejuvvon válgalogahallamii, njuolgga válgalávdegotti doaimmahagas tel. 010 839 3155, 010 839 3177, dahje suddjejuvvon šleađgapoastta bokte.
Jus olmmoš dovdá, ahte son lea eahpevuoiggalaččat guđđojuvvon eret válgalogahallamis dahje su guoski merkejupmi válgalogahallamis lea boastut, sáhttá čálalaččat gáibidit njulgema válgalávdegottis maŋimuštá cuoŋománu 14. beaivve ovdal dmu 16.00.
