Riikkabeaiválggaid ovdajienastus álggii otne gaskavahku. Lismmá giláža ássit besse dál álkit jienastit jienastanbiillas, eaige sii dárbbašan vuodjit 100 kilomehtera duohkái Anárii dan dihtii.
Lismálaš Oula Sara lei vuosttas jienasteaddjiid joavkkus Lismmás. Son lea mearridan jienastit sápmelačča.
– Dieđusge sápmelašvuohta munnje gal váikkuha eandalii ja dat lea rivttes sápmelaš. Dasto ealáhus lea dehálaš, ahte dat, gean jienastan, galgá eandalitge goit boazodoalu ovddosguvlui figgat doalvut, dadjá Sara.
Lismálaš Hansi Länsman áigu jienastit iežas guovllu olbmo.
– Dakkára, gii ádde áššiid, mat leat sápmelaččaide ja gieldda olbmuide dehálaččat.
Lismálaš Riitta Näkkäläjärvi jienastanmearrádussii váikkuhit evttohasa bellodat ja dat, mo dovdá evttohasa. Naba leatgo sus eará ákkat mo jienastit?
– Eai rievtti mielde, álo jienastan nissonolbmo. Euroválggain dušše lean jienastan almmáiolbmo, go lei evttohas iežan sogas.
Su mielas lea álki, go sáhttá jienastit iežas gilážis.
– Dát lea mu mielas fiinna bálvalus. Ávžžuhan buohkaid jienastit ovddalgihtii, vaikko jienastanbiila ii livččiige geavahusas.
Válgadoaibmaolmmoš: Lismmás lea buorre jienastanproseanta
Kati Vuoriaro vuodjá girjebusse ja bargá seammás válgadoaibmaolmmožin. Son lea vuohttán, ahte Lismmás gávdno válgamokta.
– Deikehan lea álo somá boahtit. Jienastanproseanta lea gal hirbmat stuorra dáppe Lismmás, ahte gal áiddo dán báikkis lea somá álggahit dán jienastanhommá.
Vuoriaro muitala, ahte Lismmá lassin maiddái ovdamearkka dihtii Suoločielggis ollu olbmot geavahit jienastanbiilla bálvalusa.
– Eai dušše báikkálaš olbmot, go doppehan leat olu turisttat, ja ovdajienastit sáhttá gos beare.
Ovdajienastus nohká maŋŋebárgga
Jienastanbiillat johtet buot eará sámegielddain earret Ohcejogas. Eanodagas lea okta ovdajienastusbáiki, Anáris guokte, Ohcejogas golbma ja Soađegilis njeallje.
Álkimusat ovdajienastusbáikkiin ja -áiggiin gávdná dieđuid ruoktot sáddejuvvon jienastusrievttis dahje neahtas riekteministeriija válgabálvalusas.
Ovdajienastus lea vejolaš buot Suoma ovdajienastusbáikkiin ja maiddái olgoriikkain.
Ovdajienastus nohká maŋŋebárgga 28.3. diibmu 20. Riikabeaiválggaid áitosaš válgabeaivi lea cuoŋománu 2. beaivve.