EU-parlamenttas lea jođus Sápmi Summit, mii čohkke oktii Suoma, Ruoŧa ja Norgga sámedikkiid ovddasteaddjiid ja EU-dási mearrideaddjiid.
Ulbmilin lea buktit álgoálbmogiidda guoskevaš áššiid lagabui mearrádusaid dahkama EU:s.
Čoahkkima guovddáš fáddán leat árktalaš guovllu dálkkádatrievdan, Eurohpa uniovnna davvi politihkkii ja sámiide laktáseaddji gažaldagat ja maiddái árbevirolaš diehtu ja kulturárbi sámeservošiin.
Čoahkkin lea historjjálaš, goassige ovdal EU-parlameanttas ii leat ordnejuvvon dákkár dilálašvuohta.
Eurohpa parlameantta maltalaš ságadoalli Roberta Metsola atná hui dehálažžan, ahte sápmelaččat bohtet Brusselii muitalit fuolaideaset, iige su mielas dálkkádatrievdan leat unnimus dain fuolain. Son maid atná árvvus dan, ahte beassá eamidastit Sápmi Summit -čoahkkima ja lohká áddet sámiid dili.
– Dál hállojuvvo kultuvrra gudnejahttimis, sápmelaččaid árbedieđus ja gielain. Dovddastit hástalusaid ja váttisvuođaid, maid searvvuš lea vásihan juoba čuđiid jagiid. Parlameanta lea áli sihkkarastán, ahte dat gudnejahttá, dovddasta ja ádde sámeáššiid, dadjá Metsola.
Sámedikkit geigejedje ávžžuhusa Suoma stáhtaministarii
Čoahkkima oktavuođas geigejuvvui otne duorastaga maid ávžžuhus, mas Sámi parlamentáralaš ráđi (SPR) njunnošat bivdet heaittihit riikkaidgaskasaš olmmošriektesoahpamušaid loavkašuhttimiid golmma riikkas.
Sámi parlamentáralaš ráđđi doarjala Suoma stáhtaministarii ja ráđđehussii das, mo Suopma sáhtášii sihkkarastit sápmelaččaid iešmearrideami nu mo eamiálbmotrievttit geatnegahttet.
– Suopma, Ruoŧŧa ja Norga rihkkot dáid álbmogiidgaskasaš olmmošriektesoahpamušaid, ja mii sávvat ahte stáhtaministtar Sanna Marin doalvu ovddosguvlui sáni, ahte dáid áššiid ferte čoavdit ja dát leat duođalaš áššit, dadjá sámediggeáirras Pirita Näkkäläjärvi.
Breavastis oaiveministtar Sanna Marinii SPR bivdá ráđđehusa váldit duođas eamiálbmotrivttiid.
Sámi parlamentáralaš ráđi njunnošat fuopmášuhttet Suoma, Ruoŧa ja Norgga stáhtaid das, ahte eamiálbmoga iešmearridanrievtti galgá ollašuhttit nu, ahte dat guoská buot hálddahusa dásiid ja mearrádusaid dahkama gielddain, eanangottiin ja riikkaviidosaččat láhkaásaheamis.
Breava leat vuolláičállán Sámi parlamentáralaš ráđi ságajođiheaddji, Ruoŧa sámedikki stivrra jođiheaddji Håkan Jonsson ja SPR várreságajođiheaddjit, Sámedikki presideanttat Silje-Karine Muotka ja Tuomas Aslak Juuso.