Ruávinjaargâst uárnejui majebaargâ 21.3.2023 Arctic Skills (Arktâlâš tááiđuh) -kištotábáhtus. Tábáhtus ulmen lii anneeđ áárvust áámmátlâš pargoi rähtim, já adeliđ máhđulâšvuođâ áámmátškoovlâi uáppeid viärmádâttâđ nubijdiskuin.
Tábáhtusâst lijjii maaŋgâlágán tááiđuh main kištottâllâđ, ovdâmerkkân design, automáálám já puásuituálu. Ohtsis ereslágán fáádáh lijjii 14. Kišto palhâšumeh lijjii miitaal já diplom. Tábáhtusâst lijjii uásálisteeh Suomâst, Ruotâst já Taažâst. Ovdil Murmanskist-uv láá lamaš uáppeeh fáárust.
Avveellâš Ulpu Mattus-Kumpunen uásálistij tyejikiišton. Sun máttááttâl timmâtuojijd Säämi máttááttâskuávdáást. Mattus-Kumpunen raahtij šišnetaavlu, mast lii juoŋâsij kove.
Mattus-Kumpunen poođij nubben já finnij tyejestis silbâmiitaal. Timmâtyejikišto vyeittee Inger Karoline Gaup tuoijui ärbivuáválâš tekniikáin šišnelaavhâ, mast ij kuittâg lah ärbivuáválâš häämi.
– Mun iberdâm, ete mondiet tot vyeittee vuoitij. Tot lavkkâ lâi nuuvt fiijnes já tot puávtáččij leđe kost peri muotičáittusist, Mattus-Kumpunen rámmoo.
Timmâtyejikišto ravvuuh lijjii, ete tyeji kalga čäittiđ jieijâs ärbivuáválâš kulttuur já tom kalga tuoijuđ ärbivuáválâš vuovvijn. Tyeji kalga leđe meiddei taggaar, ete kii peri puáhtá tom kevttiđ.
Uáppeeh lijjii uážžum pargopitá jo mánuppaje tassaaš. Tyeje rahtim puovtij algâttiđ jo ovdil kišto, mutâ tom koolgâi tuoijuđ loopân pääihi alne vâi máttáátteijeeh pyehtih visásmittiđ, ete pargoh láá porgum olmânáál já olmâ vuovvijn.
Uáppei mielâst tábáhtus ij tarbâšiččii leđe kišto
Uáppei mielâst Arctic Skills -tábáhtus ij tarbâšiččii veltihánnáá leđe kišto. Timmâtyejikištoost lijjii Ulpu Mattus-Kumpunen lasseen tuše kyehti uásálistee Taažâst. Suu mielâst lâi suotâs teivâđ eres uáppeigijn já viärmádâttâđ siiguin. Kištoost lâi šiev vuoiŋâ já kištottelleeh išedii nubijdis táárbu mield.
– Mun lijjim vahâgist kuárrum oovtâ uási puástud, te nubbe uásálistee iävtuttij, ete maid jis tun porgâččih návt já luoihâttij munjin suu piergâs, muštâl Mattus-Kumpunen.
Arctic Skills uárnejeijei mielâst puoh tábáhtus uásálisteeh vuoittii, ko sij finnejii uđđâ tááiđuid já vuovijd rähtiđ jieijâs pargoid. Ton-uv tááhust tábáhtus lâi uásálisteid eenâb ko tuše kišto.