Eanodatlaš duojár Marja Näkkäläi geigejuvvui Sámedikki kulturbálkkašupmi eallinbarggustis ovddas manna lávvordaga Heahtás.
Sámedikki kulturlávdegoddi ákkastalai bálkkašumi dáinna, ahte Näkkälä lea guhká bargan dehálaš barggu earret eará kulturárbbi ovddideames ja son lea dolvon dán árbbi maid ovddosguvlui ođđa sohkabuolvvaide. Kulturlávdegottis háliidedjege loktet kulturbargiid, árbediehttiid ja kulturčehpiid oidnosii, geat eai válgetkeahttá muđui dihtto nu ollu.
Marja Näkkäläi duodji leamašan álot váimmoášši ja son giitalage bálkkašumi ovddas.
– Gal dat soaitá loktet dan giehtaduodjemovtta. Jurddašit gal dat gánneha dahkat. Gal dat lea nu lunddolaš dieđus sámeolbmuide dahkat daid čiŋaid ja goarrut. Bágguhan lea goarrut, go háliida bidjat nala gávtti. Dat mearkkaša hui olu munnje duot sámi hommá, sámi eallin ja kultuvra, dadjá Näkkälä.
Näkkälä lea eret johtti boazodoallobearrašis Neakkela gilis. Duodji leamašan álot sutnje eallinvuohki.
– Dat lea dieđusge varraárbi. Lean nu šaddan dasa, in leat dárbbašan nu válljet dan. Mun issorasat liikojin dieđusge dahkat daid dujiid, muitala Näkkälä.
Ráhkkáseamos duojit konfirmašungávttit mánáide
Duoji Näkkälä lea oahppan eatnistis, guhte lei duodječeahppi.
– Eadni attii álot guolgabinnáid goarrut. Galggai álot barggešiid dahkat, bárgidit ja sistedujiid. Gal eadni álot válddii min mielde, duljiid navildii ja dahkat dain sisttiid. Gal mun lean álot šaddan daidda giehtaduodjehommáide, dat ii leat mihkkege ođas obanassiige.
Eallimis áigge son lea bivttastan iežas bearraša ja maid soga juolgevuođus gitta oaivečohkkii. Seammás son lea sirdán duodjeárbbi maid nuorat buolvvaide.
– Gal lean geahččalan čájehit ja gal mun eará olbmuidege oahpahan.
Ráhkkáseamos duodjebargu Näkkäläi leamašan goarrut konfirmašungávttiid mánáide. Maiddái nuvttohiid ja gálssohiid goarrun lea su miela mielde. Dál son lea ealáhagas, muhto duddjo goit ain, muhto ii nu viššalit go ovdal.
– Gal mun lean dahkan visot maid gálgá. Dál mun lean ulloliinniid muhtumin gillen gođđit. Gal dat ferte sistebusse goarrut ja nuvttohiid maid, álot maid nagoda ja gille. Lean veháš dego láikon, iige álot dárbbaš nuge dádjut dáiguin, bohkosa Näkkälä.
Laiti ja Kaarret oažžuba maid kulturbálkkašumi
Áibbas joavdelassan Marja Näkkälä gal ii goassege sáhte leat ja dál oahpahage Sámi oahpahusguovddáža kurssas ulloliinni gođđima.
– Suohttas dihte álgen doallat dan kurssa, go nu sihte dat oahppit. Ja suohtas dat lea muhtomin vuolgit ruovttus eret, beassá oaidnit olbmuid, oahpes olbmot doppe leat kurssas, muitala Näkkälä.
Näkkälä lassin 3 000 euro sturrosaš kulturbálkkašumi oažžuba dán jagi maid Yle Sámi doaimmaheaddji Anja Kaarret ja duojár Marja-Liisa Laiti.
Laiti ja Kaarret oažžuba iežaska bálkkašumiid njukčamánu 31. beaivve Anáris.