Davvi-Suoma unna gilážiin illá dihttojit Suoma riikabeaiválggat. Ovdamearkan Anára márkanis oidnujit dušše gávcci válgaplakáhta báikkis, gos ovdal lávijedje leat máŋggaid mehteriid ovddas iešguđetlágan válgaplakáhtat maid evttohasat heŋgejedje oidnosii jienasteaddjiid várás.
Dán áigge árbevirolaš kampanjerenvuohki orru jávkamin, muhto ođđa áigi lea buktán fas ođđa vuogi kampanjeret ja dat lea juohke ovtta lupmas namalassii telefonis.
Gulaskuttaimet muhtin bellodagaid doaimmahagain, ahte gosa válgakampanjeren lea sirdašuvvan go dat illá oidnosta giligovas.
Bellodagain árvalit, ahte árbevirolaš vuohki cegget válgaplakáhtaid lea vajálduvvamin ja válgakampanjeren lea sirdašuvvamin eanet ja eanet sosiála mediaide. Eandalit nuoraid sáhttá eambbo olahit justa namalassii sosiála mediain degomat Tiktokiin, mii lea bivnnuhis videobálvalus nuoraid guovdu.
Loga lasi suomagillii: Tiktokia käyttävistä nuorista lähes kolmannes äänestäisi perussuomalaisia – kokoomusta vain joka kymmenes
Jienasteaddji: Boaresge kampanjerenvuogit leat ain anolaččat
Gulaskuttaimet Anára márkanis olbmuiguin, makkár sin mielas válgakampanjeren leamaš dál ja mo dat lea oidnon jienasteaddjiide.
Aleksi Ahlakorpi lea fuomášan, ahte válgamáidnun lea sirdašuvvan nehttii ja sosiála mediaide. Muhtin válgaplakáhta lea songe oainnestan márkanis, muhto eambbo neahtas.
– Lean oaidnán, ahte olbmot leat máksán das, ahte mun oainnán daid máidnumiid. Leat máksán Instagramis, Facebookkas, ahte dat máidnumat oidnojit doppe, muitala Ahlakorpi iežas fuomášumiin.
Ahlakorpi árvala, ahte sosiála mediat addet buoret lávddi evttohasaide ovdanbuktit áššiid, maid bealis áigot bargat, jus besset riikabeivviide.
– Jus lea gasku gili plakáhta, de das lea govva dan olbmos, muhto sosiála medias sáhttá čilget ieš daid fáttáid birra, main hálida muitalit. Maiddái dat, ahte evttohasat besset háleštit olbmuiguin doppe, lea álkkit váldit oktavuođa evttohasaide, smiehtada Ahlakorpi.
Boares válgamáidnumis leat goit Ahlakorpi mielas ain buorit bealit, dange ii gánnet vel vajáldahttit.
– Gal dange dárbbaša, ahte dat oidno dás gasku gili, ahte ii leat beare sosiála medias.
Hilma Mustonen lea viššalit čuvvon riikabeaiválggaid giccu. Son lea earet eará geahččan tv:s válgapanelaid ja oainnestan muhtin válgamáidnosage.
– Ovtta lean fuomášan, Ohcejot gánda, earáid gal in leat fuomášan. Ja go Avvilii vuodjá, de sáhttet muhtin máidnosat oidnot.
Válgabeaivi lea sotnabeaivve
Riikabeaiválggat leat sotnabeaivve 2.4. Ovdajienasteapmi álggii mannan vahku gaskavahku 22.3. ja nohká otne maŋŋebárgga.