Eanodaga gielda ruhtadišgoahtá fas moatti jagi bottu maŋŋá sápmelaš mánáidkulturguovddáš Mánu doaimma. Eanodaga buresveadjinlávdegoddi mearridii áššis mannan vahku čoahkkimisttis.
Gielda oassálastá Mánu ruhtadeapmái jagiid 2023–2025 jahkásaččat 3 000 euroin. Maŋemuš geardde Eanodat leamašan doaimmas fárus 2020–2021.
Sápmelaš mánáidkulturguovddáš Mánu ulbmilin lea earret eará buvttadit mánáide ja nuoraide kultuvrralaš ja gielalaš doaimmaid skuvllaide, beaivedikšobáikkiide ja maiddái eará dáhpáhusaid oktavuođain.
Mánu doaimmajođiheaddji Petra Biret Magga-Vars lea ilus, go Eanodat fas juolluda ruđa sámi mánáidkulturguovddáža doaimmaide.
– Dat addá positiivvalaš signála. Dáinna unna ruhtasupmiin gielda dievasmahttá kulturbálvalusaidis mánáide ja nuoraide, mat muđuid eai ollašuva gieldda bealis. Mánnu lea okta buorre lasáhus dasa, deattuha Magga-Vars.
Mánnu ordnen doimmaid Eanodagas, vaikko gielda ii leatge álot dorjon
Sámi mánáidkulturguovddáš Mánnu lea álggahan doaimmas jagis 2004 ja dan ruhtadit oahpahus- ja kulturministeriija, Sámediggi ja sámeguovllu gielddat ovttas.
Eanodaga gielda ii leat ruhtadan Mánu doaimma seamma jeavddalaččat, go eará sámegielddat. Ovdamearkka dihte jagis 2017 gielda sihkastii doarjaga eret bušeahtas gieldda heajos ruhtadili geažil. Liikká Mánnu lea ordnen doaimmaid maiddái Eanodaga guovllus.
Magga-Vars sávvá, ahte sámegielddat oainnáše sámemánáid kulturdoaimma mávssolažžan ja buorrin iežas fálaldagaid searvvis.
– Dáinna unna ruhtasupmiin gielda dievasmahttá kulturbálvalusaidis mánáide ja nuoraide, mat muđuid eai ollašuva gieldda bealis. Mánnu lea okta buorre lasáhus dasa, deattuha Petra BIret Magga-Vars.