Nuorâi jienâstemprooseent njejâmist vaaljâin lii lamaš saahâ jo kuhháá. Tääl kuittâg nuorah láá perustum eenâb politiikâst, čiälgá vorâs gallupist. Tai tiäđui mield masa 80 prosenttid vuálá 30-ihásijn áiguh jienâstiđ Suomâ ovdâskoddevaaljâin.
Nuorah puávtáččii jienâstmáin tuođâi vaiguttiđ valjâpuátusáid, osko politiik professor Laura Junka-Aikio.
– Mist tääbbin tavveen láá ennuv nuorah já tagareh kiäh iä jienâst. Jis sii juávhust láá nuorah kiäh tääl movtáskeh, te tot vaaigut valjâpuátusân, čielgee Junka-Aikio.
Ovdâskoddevaaljâi munejienâstem lii nuuhâm, mutâ nuorah iä liijká oinum Aanaar markkân jienâstempääihist. Valjâpargee Markus Virtanen muštâl, ete jienâsteijeeh láá lamaš iänááš páiháliih já astoääigi vietteeh.
– Jienah láá vuálgám pirrâ Suomâ, mut nuorah iä lah ennuv oinum. Mun lam imâštâllâm kost sij láá, iätá Virtanen.
Jienâsteijei mielâst munejienâstem lii älkkee já jotteel
Paijeel miljovn jienâsteijed ellii taan ive jienâstmin muuneeld. Munejienâstem nuuvâi majebaargâ. Jienâsteijei mielâst tot lii älkkees já jotelis toimâttâs, já tom puáhtá tipšođ siämmáá reeisust ko lii mudoi-uv markkânist. Maaŋgah halijdeh jienâstiđ muuneeld, vâi ij taarbâš smiettâđ piäsá-uv valjâpeeivi jienâstiđ.
– Jurdâččim tääl eelliđ jienâstmin, vâi ij pääsi tast kiddâ, jis jiem pesâččii valjâpeeivi jienâstiđ, agâstâl Emma Nokela.
– Halijdim puáttiđ munejienâstmân, amas vájáldittiđ talle ko lii olmâ jienâstempeeivi, Saammâl Morottaja muštâl.
Emma Nokela iävtukkâs kalga iberdiđ maggaar eellim lii uccâ kuávluin. Sunjin pirâsääših já olmoošvuoigâdvuođah láá teháliih. Samu Hurskainen mielâst iävtukkâsâst kalga leđe siämmáálágán árvumaailm ko sust.
Hiäivulii iävtukkâs kavnâm ij lah ain älkkee, mutâ valjâmašinijn puáhtá uážžuđ iše valjiimân. Yle já Helsingin Sanomat valjâmašineh láá lamaš pivnoheh, mutâ motomij mielâst tain ij lamaš ävkki.
– Kevttim mun valjâmašinijd, mutâ toh lijjii heitugeh. Mašinist lijjii hyeneh já mánáliih koččâmušah, já vailuu teháliih ääših, läittilist Anneli Kaarret.
Ovdâskoddevaaljâin puáhtá jienâstiđ vala valjâpeeivi, pasepeeivi cuáŋuimáánu 2. peeivi tijme 9–20. Anarist jienâstem tábáhtuvá sämikirjeráájust Sajosist.