Riikabeaiválggaid vuolde lea boahtán čielgasit ovdan, ahte sápmelaččat leat šaddan eambbo aktiivan máŋgga láhkai Lappi guovllus.
Lappi universitehta politihka professor Laura Junka-Aikio lohká iežas fuomášan, ahte sámedáiddárkollektiiva Suohpanterror lea almmustahttán máŋggaid posteriid, main ávžžuhit jienastit sápmelačča riikabeaiválggain.
– Lean maid fuobmán, ahte sápmelaččat leat sosiálamedian čuollan muhtin evttohasaid beali, dadjá Junka-Aikio.
Junka-Aikio árvala, ahte sámediggelága viiddis beaggin vuhtto maid das, mo jienasteaddjit láhttejit.
– Eai sápmelaččatge leat ovttaoaivilis juohke áššis. Muhto maiddái suopmelaččain sáhttet leat čalmmit rahpasan sámegažaldagaid buohta, lasiha Junka-Aikio.
Jienaid čoaggimis dihto evttohassii sáhttá leat mearkkašupmi
Junka-Aikio smiehtada, ahte sápmelaččaid jienastanmokta ii vealttakeahttá loktan, muhto sámegažaldagaid mearkkašupmi goit sáhttá šaddat stuorábun válggaid oktavuođas.
Politihkalaš beroštumi lassáneamis sámeáššiid guovdu muitala maiddái dat, ahte sámediggelága dohkkeheami bealis čoggojuvvon álbmotadressii bohte badjel 23 000 vuolláičállosa, main birrasiid 2 000 Lappis.
– Jus dákkár bieđggus joavku vuolgá čoaggit jienaid muhtin dihto evttohassii, de das sáhttá leat stuorra mearkkašupmi, dadjá Junka-Aikio.
Ruonáid ja gurutbellodaga evttohasat dorjot sámediggelága Lappis
Sámiid rievttit DÁL -álbmotorganisašuvdna čađahii gažadeami evttohasaide, mas jerre oaivila sámediggelága dohkkeheamis dan hámis, go dat lei dán giđa riikabeivviin.
Lappilaš evttohasain lága dohkkeheami guottihedje gávcci ruonábellodaga, gávcci gurutbellodaga ja guokte sosiálademokráhtaid evttohasa ja maiddái okta ruoŧŧelaš álbmotbellodaga ja okta Suoma kommunisttalaš bellodaga evttohas.
Ii oktage olgešbellodat Kokoomusa, guovddášbellodaga dahje vuođđosuopmelaččaid lappilaš evttohas vástidan gažadeapmái.
– Lappis stuorra bellodagat leat árbevirolaččat čoaggán jienaidis áibbas eará sajis go sápmelaččain, dadjá Junka-Aikio.
Riikadásis guovddášbellodagas, olgešbellodat Kokoomusa ja maiddái vuođđosuopmelaččain gávdnojit dakkár evttohasat, geat dorjot sámediggelága.
– Oainnášin, ahte áššit leat rievdamin. Das muitala álbmotlaš ságastallan ja dat, ahte Lappis ságastallan leamašan eanet máŋggabealat go ovdal ja eanet olbmot leat beroštuvvan fáttás, dadjá Lappi universitehta politihka professor Laura Junka-Aikio.
30.3.2023 dii. 12.40. Dán seamma fáttás leamašan Yle Ođđasat -sáddagis 29.3. ja radioođđasiin 30.3. lea geavahuvvon boastto doaba, álbmotálgga. Sáhka lea goittotge adreassas.