Anarâškielâ seervi ihečuákkim tollui njuhčâmáánu 22. peeivi Anarist. Čuákkimist savâstâllii seervi lostâtooimâ nubástusâin já ruttâdemčuolmâin.
Seervi lostâtoimâ vijđánij algâivveest ko Anarâš Aavis -uđâslostâ almostuuškuođij. Servi piäjá naavcâid aavis almostitmân já tondiet Anarâš-lostâ almostuvá tuše ohtii taan ive já Loostâš-digilostâ kuohtii. Jis servi finnee eenâb ruttâdem, te sij almostiteh lase loostâid. Seervist láá kuittâg lamaš čuolmah lostâtooimâ ruttâdmist.
Čuákkimân uásálistij anarâškielâ seervi jeessân Petter Morottaja. Sun movtáskij puorijn uđđâsijn já eromâšávt Anarâš Aavisist.
– Anarâš-loostâst lii ain lamaš taggaar čuolmâ, ete tot ij lah uđâslostâ. Jis miinii tilálâšvuođâid uárnejuvvoo, te ij tast pyevti Anarâš-loostâst tieđettiđ, jis tot lii almostum kulmii ivveest, Morottaja čielgee.
Servi áigu vuájudâttâđ uđđâsij almostittem lasseen kirjálâšvuođâ jurgâlmân já almostitmân. Uđđâ kirjeh láá-uv puátimin, ovdâmerkkân Timo Parvela Ella Laapist já Jeff Kinney Čuovâuáivi peivikirje 4. Servi uárnee kreatiivlâš čäällimseminaarijd anarâškielâlij novellij čäällim várás. Ulmen lii almostittiđ siämmáálágán antologia ko Kyelisieidi maccâm já eres novelleh ivveest 2005.
Čuákkimist väljejii siärván meid stiivrâ, Márjá-Liisá Olthuis juátká saavâjođetteijen já Miina Seurujärvi värisaavâjođetteijen. Seervi tieđetteijen juátká Fabrizio Brecciaroli, kii västid meiddei seervi jeessânaašijn.