Dán vahkuloahpa lágidit Anáris SM-gilvočuoigamiid Juvduvári čuoiganguovddážis. Yle lea sádden bearjadatiđit 31.3. njuolggoosiid gilvvohallanbáikkis.
Vuosttasin doaimmaheaddji Susanna Guttorm lei mielde Ylen aamu-prográmmas sullii diibmu 9.12 ja su guossin jearahallamis lei Anára gielddahoavda Tommi Kasurinen.
Diibmu 10 rájes sáddejuvvui fas Yle njuolggostriima gilvvohallanbáikkis, man láidestii doaimmaheaddji Jarmo Siivikko. Sus guossin striimas leigga goit nuorra Inarin Yrits-searvvi čuoigi Eelis Valikainen ja Kari Kyrö.
Gielddahoavda: Dáhpáhusas lea stuorra mearkkašupmi unna gildii
Gilvvohallamiid ovdii leat bargan jo moadde jagi. Čuoiganstadionii leat huksen fuolahanbarttaid, plánejuvvon gokko láhtut mannet ja maiddái el-rávdnjekabeliid leat geassan lasi.
Anára gielddahoavda Tommi Kasurinen oaidná SM-gilvvuin stuorra mearkkašumi unna gildii.
– Ovttas láideaddjiservviin, gielddain, guovllu fitnodatdoalliiguin ja ássiiguin leat huksen buorre gilvomovtta. Dan lassin idjadeamit, boradeamit ja guovllu bálvalusaid geavaheapmi buktá dietnasa guvlui.
Kasurinen oaidná dáhpáhusa maid guhkit áigge váikkuhusaid.
– Mishan lea dál čuoigansesoŋŋa jođus, dán vahkuloahpas sm-gilvvut ja vahku geažes Vaskooličuoigan Suoločielggis. Sihkkarit máŋggat oassálastit, sin fuolaheaddjit ja geahččit máhccet vel maŋŋáge mielas muittašit árat dáhpáhusaid.
Gilvvut bistet bearjadagas sotnabeaivái
Vahkuloahpa áigge čuiget bearjadaga nissonat 5 kilomehtera ja albmát 10 kilomehtera, lávvardaga čuiget stafeahtaid ja sotnabeaivve vel nissonat čuiget 30 kilomehtera ja albmát 50 kilomehtera.
Anáris leat ovddit háve gilvvohallan Suoma meašttirgilvvuin jagis 1999.