Deanus joatkašuvvá luossabivdogielddus geassit 2023, go eai leat vuos mearkkat das, ahte Deanu luossanálli livččii buorránan. Eanan-ja meahccedoalloministeriija dieđihii mannan vahkus, ahte vaikko luosa ii oažžo bivdit, de dál leat ráhkkanan ruoššaluosa bivdui.
Ruoššaluosa sáhttá bivdit guovtteláhkai dán jagi. Vuosttažettiin dan sáhttá bivdit eará guolástusa oktavuođas, go čuovvu Deanučázádaga guoskevaš njuolggadusaid ja leat dárbbašlaš guolástuslobit. Nubbi vuohki bivdit ruoššaluosa lea dahkat sierra bivdofidnu, man plána galgá almmuhit ovddalgihtii Lappi EBI-guovddážii 19.6. rádjái.
Bivdu ii goit oaččo dagahit Deanu luosaide vahágiid ja jus Deanu luossa báhcá bivdosiidda, de daid galgá luoitit ruovttoluotta johkii, muittuhit eiseváldit. Sankšuvdna Deanu luosa váldimii lea 3 480 euroa.
Dát ruoššaluosa fidnobivdu lea ráddjejuvvon dušše daid báikkálaččaide, geain leat bivdovuoigatvuođat, muitala Deanu guolledoalloguovllu doaimmajođiheaddji Niilo I. Aikio.
– Olgobáikegoddelaš ii sáhte ohcat dan. Dat, gii dal áigu ohcat dan lobi EBI-guovddážis, ferte leat dakkár olmmoš, gii vástida dan áššis. Ja nammadit, ahte geat dasa áigot oassálastit ja makkár bivdovugiiguin áigot bivdit, ja čilget vel gos áigot bivdit ja man áigodagas.
Aikio muitala vel, ahte go bivddus leat geargan, de ferte raporteret mánotbaji siste EBI-guovddážii.
– Dasa galgá čállit visot dieđuid, bivdobeivviid, goas maid lea goddán. Ja dieđus jus luossa lea darvánan bivdosii, ahte makkár luossa ja galle luosa.
Ministeriijas deattuhit, ahte dat, gii vástida bivdofidnus, ferte fuolahit, ahte goddojuvvon ruoššaluosat váldojuvvojit biebmun dahje muđui duššaduvvojit.
Deanus sáhttá oaggut maid eará guollešlájaid go luosa, ovdamearkan soavvila, čuovžža, mearradápmoha ja hávgga. Báikkálaččaid guollebivdu álgá 1.6. Olgobáikegoddelaččaid ožžot bivdigoahtit stákkuin 15.6. rájes.
Ruoššaluosa bivddus lei sáhka duorastaga 1.6. Ylen aamu-prográmmas sullii diibmu 9.12. Doaimmaheaddji Susanna Guttorm guossin leaba Ohcejoga gieldda eallinfápmohoavda Tanja Lepistö ja Deanu guolledoalloguovllu doaimmajođiheaddji Niilo I. Aikio.