Meahcceguovlu Anárjávrri birrasis lea dán rádjai seilon eanaš luonddu dilis. Dál Sámi meara gáttiide leat goittotge plánemin luksushoteallagilážiid. Suopmelaš neavttár Jasper Pääkkönen ja it-millioneara Veikko Lesonen áiggošeigga guktot huksehit Anárjávrri gáddái iežaska luksushoteallaid.
Áššis lea gevvojuvvon garra ságastallan Anáris juo máŋga jagi. Dán vahkus fáddá loktanii fas riikkadási ođđasiidda, go Ilta-Sanomat-aviisa almmustahtii viiddes artihkkala, mas muitaledje dárkileappot dáid luksushoteallaplánain.
Yle Sápmi finadii Avvila márkanis gulaskuddamin, ahte maid olbmot jurddašit dáid plánaid birra. Jearaimet, ahte galgágo Anárjávrri biras bissut luonddudilis vai čáhketgo luksushoteallat eambboge Lappi stuorámus jávrri gáddái.
Muhtimat eai hálit šat hoteallaid lasi, nuppitges sávvet buresboahtima
Avvillaš Erno Salonen oaivvilda, ahte Anára gieldda guovllus álget leat juo doarvái luksushoteallat.
– Gal dat orrot leamen dán guovllus jo áibbas muttát olu, ii dárbbašivččii gal eanet hukset deike Suoločielgái, Avvilii ja Anárjávrri guvlui, dadjá Salonen.
Oululaš ovddeš fitnodatdoalli, dálá ealáhatolmmoš Jouko Vironen láve johtit Anárjávrri sullos iežas lustabarttas. Su mielas luksushoteallat leat buresboahtin Anára viiddes guovlluide.
– Luksushoteallat buvttášedje oinnolašvuođa Anárii ja Avvilii. Mun gal doarjjun Veikko Lesonen ja Jasper Pääkkönen prošeavttaid, dadjá Vironen.
Vironen ii oainne váttisvuođa das, ahte luksushoteallaid áiggošedje hukset doares beale meahcceguovlluide.
– Dat turisttathan bohtet geahččat Suoma čáppa luonddu. Ii dat gal leat váttisvuohta, jus dasa geavahuvvošiige 0,5 kilomehtera gáddeeana, dadjá Vironen.
Avvillaš ealáhatolmmoš Ilkka Roininen lea dovddus luonddu bealušteaddji Anára guovllus. Son gal háliidivččii seailluhit Anárjávrri ja dan gáttiid luonddu dilis.
– Jávrri iešvuohta jávká oalát, jus dohko huksejuvvojit luksushoteallagilit.
Roininen oaivvilda, ahte huksemat golahit ja seammás maid jávkadit luonddu birrasis. Su mielas hoteallaid galggašii hukset dohko, gos gávdno juo gárvves infrastruktuvra.
Pääkkönen: ”Luondomátkeealáhus sáhttá caggat ruvkkiid”
Jus Jasper Pääkkönen ja Veikko Lesonen luksusfidnut ollašuvvet Anárjávrri gáddái, de lea sáhka logiid miljovnnaid euroid prošeavttain.
Pääkkönen áigumuššan lea hukset Anárjávrri Naaŋŋânjárgii hotealla, man arvalit máksit birrasiid 35 miljovnna euro. Gielda lea juo dohkkehan lávvarievdadusa, mii addá vejolašvuođa hukset jávregáddái. Alimus hálddahusriekti soaitá goit vel váldit vuostá váidagiid ášši olis, mii sáhttá maŋidit dahje bissehit prošeavtta.
Lesonen fas pláne hukset luksushotealla Almaanjárgii, mii lea oalle láhka Anára girkosiidda. Vaikko Anára váldostivra hilgguige gáddeláva nuppástusa jahki dassái, de hoteallagilli soaitá ain ceagganit Almaanjárgii. Anára váldostivra gieđahallá Almaanjárgga lávvarievdadusa ođđasit boahtte čavčča ja vuordimis lea, ahte áššis váidojuvvo.
Ilta Sanomat -aviisa čállosa maŋŋá Pääkkönen almmustahtii almmolaš čállosa Facebookas, mas son bealuštii iežas hoteallafidnu. Son buktá ovdan čállosisttis, ahte Lappis leat ealáhusaid dáfus guokte realisttalaš molssaeavttu, ruvkeindustriija dahje mátkeealáhus.
Pääkkönen oaivvilda, ahte ealli luondomátkeealáhus sáhttá caggat ruvkkiid ja lasihit bargosajiid davvin. Luondomátkeealáhus lea maid bistevaš doaibma ruvkeindustriija ektui.
Pääkkönen deattuha, ahte su hoteallagilli boađášii dálá fanassátku birrasii. Lahkosis lea maiddái okta hotealla ja olu barttat. Dán oasil son ii ádde, ahte dál ságastallojuvvo das, ahte hotealla huksejuvvošii jávregáddái, mii lea luonddu dilis. Pääkkönen mielas Lappi mátkeealáhusa galggašii ovddidit birasárvvuid bokte.
– Háliidan deattuhit, ahte jus Naaŋŋânjárgga hoteallafidnu ollašuvvá, de birasvástu ja -árvvut leat alimus vejolaš dásis. Arkitektuvrra ja luonddu geahččalit heivehit oktii. Ideáladilis hotealla šaddá oassin luonddus, iige dat oba oidnoge olggo bealde gosage, čállá Jasper Pääkkönen Facebook-siiddustis.
Ságastallan joatkašuvvá Yle Sámi rádio Dearvva-sáddagis 31.5. Sádde iežat kommeantta studio Whatsapp-nummirii 040 190 9114. Áššálaš kommeanttat besset mielde radiosáddagii.
Ášši dievasmahtton 1.6.2023 diibmu 9.10. Lasihuvvon diehtu das, Anára váldostivra hilggui Almaanjárgga gáddeláva nuppástusa jahki dassái.