Sámeoahpahusa ja sámiid politihkalaš árbevieruid dutkamii lea mieđihuvvon oktiibuot miljon euro ovddas ruhtadeapmi Suoma Akademiijas.
Lappi universitehta professor Pigga Keskitalo jođiha dutkanfidnu, mas dutkit lávkejit skuvlamáilbmái dutkat áitojuvvon sámegielaid oahpahusa dili ja dan, maid sámi bajásgeassinárbevierru mearkkaša geavatlaččat oahpahusas.
– Oahpahussii gánneha viggat buktit ja hutkat vugiid, mat álkidivčče ohppiid ja oahpaheaddji oalle hástaleaddji árgabeaivve, muitala Keskitalo.
Dutkanfidnus láhčigohtet gielladiđolaš oahpahusa, nappo oahpahusa, mii addá ohppiide viiddis áddejumi giela birra. Oahppi beassá geavatlaččat bargat, haksit ja smáhketge giela, čilge Keskitalo.
– Sámeoahpahusas ohppiid gielladáidu sáhttá rievdadallat ja danin oahpaheaddjis gáibiduvvo dáidu heivehit oahpahusa iešguđetge oahppi dárbbuide.
Lappi universitehta ossodat šaddá Anárii
Lappi universitehta dutki Áile Aikio illuda stuorra ruhtadeamis ja atná dan mearkkašahttin sámedutkamuššii.
– Akademiija ruhtademiin lea hui garra gilvaleapmi ja hui unnán dutkanprošeavttat ožžot dan. Dat muitala, ahte sámedutkamušas lea hui alla dássi, jurddaša Aikio.
Lappi universitehta háliida bidjat eanet návccaid sámedutkamuššii ja danin universitehta okta ossodat šaddá Anárii, illuda Aikio. Su mielas lea hui dehálaš, ahte sámedutkamuš dáhpáhuvvá Sámis.
– Mii leimmet justa bargolanjaid geahččamin. Lappi universitehta láigoha fásta bargolanjaid midjiide, ahte dat sajáiduvvá sámeguvlui.
Aikio lea mielde Suoma Akademiija ruhtadeami ožžon dutkanjoavkkus.